«Голосы Русинів Підкарпатя» – середа, 18.10 год.

Што лем теперь сьме слухали переспів знамой русиньской лефенды «Про Шовкову Косицю». Автор віршованых шориків є Юрко Бабинець, а музика выґенерована штучным інтелектом.

За час роботы на проєкті «Голосы Русинів Підкарпатя»  спознав єм ся з многыма представниками нашого маленького народа. Але час од часу стрічам з людми, бесіда з котрыма вріже ся до памяти надовго. Бісідую нелем о таленті ці ґеніалности респондента, а веце о його чістій, часто – кріштальовій душі, великім сердцю.

Юрко Бабинець мав дяку з дітинства стати конштруктором літаків. Зато і пішов штудовати на Закарпатьскый гелікоптеровый технікум у Дубовому. Мав дяку дале вчіти ся у Харькові. Але зла доля показила вшыткы планы. Хворота чім дале, тым веце обрізала Юркови крыла…

Но любов до жытя, до свойой землі не дали му душі отравити ся, згубити ся дома. Нашов себе: жыє і дыхать на повны груди, пишучі на інтернеті. Його поезії люблять і хвалять многы, бо у них розкрывать то, што часто не валушны вчінити і фізічно цалком здоровы люде.

Слухаючі бесіду Юрка Бабинця, буде чути і о нелегкыы жывоті нашого гостя, о пути од поезії, буде чути історію краю в стихах, переспівы народных балад і коміксы на русиньскім языку.

Слухайте «Голосы Русинів Підкарпатя» в середу 16-го септембра 2026 р. о 18.10 год., або повторіня в четверь 17-го септембра о 4.30 год. і в суботу 19-го септембра о 11.00 год. за русиньскым часом.