Сумар дня на 16. вересня/септембра 2026 р.

Приносиме вам сумар медияльной ґрупы ЛЕМ.фм+ на ден 16. вересня/септембра 2026 р.

Тырват набір внесків на дофінансуваня діяльности меншыновых орґанізаций

Міністерство Внутрішніх Справ і Адміністрациі оголосило набір оферт на реализацию задач, котры мают підперати нацийональны і етнічны меншыны і розвиток реґіонального языка в 2027 році. Реґулямін затвердили 10. вересня/септембра, а набір зачал ся ден пізнійше. Орґанізациі можут старати ся достати грошы на активности і ініциятивы, котрых цілю є охорона, захованя і розвиток культурной достоменности нацийональных і етнічных меншын. Внескы з такыма офертами треба зложыти до 16. жолтня/окторба, зас внескы на підметови діяльніст – до 30. жолтня/октобра. Оферты приниманы сут выключні в електронній формі за посередництвом системы ЕСУД. Міністерство припоминат, што оферты зложены інакше будут одраз одмітуваны уж на етапі формальной оціны. Для вельох меншыновых орґанізаций, в тым для лемківскых, є то основне джерело фінансуваня культурной, едукацийной ци выдавничой діяльности в даным році.

Карпатскій Желізничный Коридор – ци і коли ся явит?

Радны Ясла хотят створити так званый Карпатскій Желізничный Коридор. В становиску, котре єдноголосно приняли, вказали трасу з Кракова, через Новый Санч, Ґорлиці, Біч і Ясло до Коросна, Санока і Загіря. Самоуряд Ясла заповідат спілпрацу з сусідніма містами і реґіонами для реализациі той концепциі. Для Ґорлиц то важный сиґнал, першый раз бо сусідній самоуряд так видимо увгляднил міста в понадреґіональным желізницьовым проєкті. Ініциятива має поправити комунікацию полудньовой Малопольщы і Підкапратя та зміцнити ролю желізниці в реґіоні. Думка являт ся в часі, коли в Ґорлицях рыхтуют будову коло 700-метрового лучника медже штреками номер 108 і 110. Інвестиция має уможнити безпосереднє получыня з центра міста в страну Тарнова ци Кракова, без зміны напряму ізды в Заґожанах. Подля авторів проєкту, розвиток желізничной інфраструктуры (разом з реализуваным фраґментом Подленже-Пєкєлко) може скоротити час подорожы до Кракова. На тот момемнт Карпатскій Желізничный Коридор остає самоурядовом концепцийом, котра потрібує підпертя черговых парнтерів і реґіональных власти.

Пілночно-східня част Словациі што раз барже популярна

В окресах Бардиів і Свидник росне туристичный рух. В першій половині 2026 рока однотували гын 112 тис. переночувань, а по увзглядніню вакацийных місяців, тото чысло може выносити аж і 160 тис. Директор Реґіональной Туристичной Орґанізациі Шариш-Бардиів Радомір Янчошек підкрислят, же реґіон уміцнят свою позицию серед найбільш одвыджаных місц на Словациі. Основном ґрупом заграничных гости сут туристы з Польщы. Становлят веце як 40 процент вшыткых, котры приходят з заграниці, а в першій половині рока в тот реґіон пришло коло 14 тис. осіб з Польщы. Популярны сут особливо Бардиівскы Купелі, історичны памяткы Дуклі, музеі і деревяны церкви. Подля локальных власти розвиток туристикы хосенно влият на господарку і рынок роботы в приграничным реґіоні.

Прелекция о печарах і ямах

Уж заран о 19.00 годині в рамках онляновых Карпатскых Стріч одбуде ся прелекция о печарах і ямах, што іх мож найти в реґіоні Низкого Бескіду. Товариство Карпатскє, орґанізатор онляновых выкладів, тым разом запросило Рафала Суского, абсольвента Ґеоморфолоґіі в Інституті Ґеоґрафіі і Пространной Господаркы Ягайлоньского Університету. Рафал Сускій науково і позанауково занмат ся печарами, тіж іх експлоруваньом. Вартат додати, што натуральне середовиско Низкого Бескіду найчастійше асоциюване єст з ожывленом природом, рідше зас через елементы його неожывленой природы. А вказує ся, што на обшыри Низкого Бескіду зінвентаризували уж соткы ям і печар, в тым пару долгости веце як 100 м. Активну в тым участ брал і заранішній прелеґент онляновой прелекциі. Стріча пройде через плятформу Zoom і канал на плятформі YouTube, а вебінариюм буде пак удоступнене на сайті karpaccy.pl.