На Ягайлоньскым Університеті основали Працовню Лемкознавчых Студий

Од 1. жолтня/октобра тр. на Ягайлоньскым Університеті буде діяла Працовня Лемкознавчых Студий. Нову єдиницю основали в структурі Філолоґічного Выділу Ягайлоньского Університету за заряджыньом но. 82 Ректора ЯУ проф. др. габ. Пьотра Єдинака з 4. вересня/септембра тр.

Як выникат з реґуляміну, задачом працовні буде вести інтердисциплинарну бадавчу, дидактичну і популяризаторску діяльніст звязану з лемківскым/русинькым языком, літературом, культуром і достоменністю. До єй задач буде належало м.ін. орґанізувати конференциі і семінариі, розвивати спілпрацу з державныма і заграничныма науковыма осередками, рыхтувати публикациі і бадавчы проєкты, а тіж підперати ревітализацийны діяня, котры тыкают языка і культуры Лемків.

Др габ. Олена Дуць-Файфер, проф. ЯУ, підкрислят, што головном цілю основаня працовні было надати барже формальный і тырвалый характер науковой діяльности, котра єст ведена од років на Ягайлоньскым Університеті в обшыри лемкознавства.

«Цілю, яку єм мала за головну, рішаючы ся на створіня працовні – было надати даякій структурный характер досліджыням і цілій науковій діяльности, яку в просторі лемкознавства веду на ЯУ» – пояснят. Як додає, нова єдиниця має злегшыти медженародну спілпрацу і дати видиме місце для бадань, дидактикы і едукуваня молодых дослідників, котры занимают ся лемківском проблематиком.

Кєрівничка ПЛС підкрислят тіж, же працовня была покликана на Выділі, а не як єдиниця єдного існтитуту. «Хочу, жебы мала она шырше влияня, была під курательом декана, не лем директора Інституту, вела досліджыня і занятя важны для цілого выділу (значыт вшыткых філолоґій)» – зазначат.

В склад ансамблю вошли представникы ріжных дисциплин і академіцкых єдиниц. Окрем проф. Дуць-Файфер і докторантів з обшыри языкознавства – Клавдиі Новак і Каміля Федериґы, до спілпрацы запрошено др. габ. Томаша Квоку з Інституту Словяньской Філолоґіі та др габ. Еву Міхну, проф. ЯУ, котра репрезентує социйолоґію. З Працовньом спілпрацувал буде тіж др габ. Марийоля Якубович (емеритувана языкознавчыні з Інституту Славістикы Державной Академіі Наук) і др Шымон Поґвізд (языкознавця з Інституту Славістикы Державной Академіі Наук).

«В тым році буде тіж звязаный з працовньом др Wang Zhiyuan – докторант, што буде в нас на Еразмусі під мойом науковом опіком. Отворены сме тіж на спілпрацу з інчыма дослідниками лемківской/русиньской проблематикы».

Як заповідат проф. Дуць-Файфер, докладны пляны діяльности будут омовлены підчас першого засіданя працовні, котре плянуване єст на початок жолтня/октобра. Єдном з першых ініциятив може быти конференция посвячена акциі «Вісла». Ґрупа буде аплікувала о бадавчы ґранты, а досліджыня будут зосереджати ся головні на тематиці звязаній з языком. «Прото, же в складі працовні сут головні языкознавці (част специялизуюча ся в історичній ґраматиці і етимолоґіі), певно будеме ся кєрункувати в тоту страну» – подає кєрівничка Працовні.

Згідні з реґуляміном, діяльніст Працовні Лемкознавчых Студий буде фінансувана з буджету Філолоґічного Выділю ЯУ, а тіж з зовнішніх середків, в тым дежавных ци медженародных ґрантів.