Сумар дня на 17. вересня/септембра 2026 р.

Приносиме вам сумар медияльной ґрупы ЛЕМ.фм+ на ден 17. вересня/септембра 2026 р.

Торжества в Тыляві

В найблизшу суботу в Тыляві пройдут торжества для упамятніня 100. річниці вертаня Лемків до православія. Божеска літургія заплянуваня єст на 10.00 годину, очолювал єй буде Його Высокопреосвященство Паісий, архієпископ ґорлицкій і перемышльскій. Подія навязує до історичных дій – в Тыляві в 1926 році част мешканців перешла з Грекокатолицкой Церкви до Православной Церкви. Рух тот был одповідю м.ін. на поступуючу латинізацию обряду і звекшене влияня украіньскых нацийональных нуртів серед грекокатолицкых священників. В черговых роках явиско обняло десяткы лемківскых сел і довело до громадных тзв. повоторів до віры вітців. Торжества мают припомнути о значыню тых подій для реліґійной і нацийональной достоменности Лемків.

Набір оферт на меншынову діяльніст на 2027 рік

Міністерство Культуры і Нацийональной Спадковины оголосило конкурс на становиско директора Інституту Языковой Ріжнорідности Польщы. Зголошыня кандидатів принимают до 15. жолтня/октобра тр., розвязаня конкурсу плянуют до половины грдуня/децембра. Од будучого директора вымагана є м.ін. высша освіта, найменше 5-літнє досвідчыня в інситуциях культуры або позаурядовых орґанізациях, а тіж три рокы на кєрівничым становиску. Кандидаты мусят знати анґлицкій язык і переписы, што тыкяют фунґуваня інституций культуры. Особливо важне буде знаня з обшыри языковой ріжнорідности Польщы. Дудатковым атутом будут – досвідчыня в заряджаню ґрупом, науковый або публицистичный доробок та знаєміст позыскуваня фінансовых середків і будуваня партнерств. Цілый реґулямін доступный є на сайті Бюлетину Публичной Інформациі Міністерства Культуры.

«Низкій Бескід. Спільный краєвид» / конференция в Ґорлицях з презентацийом результатів бадань

Як мешканці ґорлицкого повіту постерігают краєвид Низкого Бескіду і де видят границю медже розвитком а охороном його выняткового характеру? Одповіди на тоты звіданя буде мож познати 24. вересня/септембра підчас конференциі в Ґорлицкым Центрі Культуры. Стріча орґанізуваня єст в рамках шыршого проєкту «Низкій Бескід. Спільный краєвид». Бадачы провірювали, што мешканці реґіону цінят в локальным краєвиді, якы достерігают зміны ци як оціняют розвиток туристикы, нову забудову, охорону культурной спадковины і участ соспільности в підниманю рішынь, што тыкают простору. В проґрамі конференциі заплянувана є презентация результатів бадань та дискусия до звіданя – Ци тратиме краєвид Низкого Бескіду? Панелистами сут узнаны дослідникы і експерты, што репрезентуют ріжны обшыри, м.ін. ґеоґрафы, социйолоґы ци специялисты од туристикы і культурной спадковины. Конференция одбуде ся в четвер о тыжден, початок о 10.00 год. Орґанізатором є Стоваришыня «Руска Бурса» в Ґорлицях. Чысло місц ограничене – просиме потверджати присутніст до понеділька на адрес: ekretariat@ruskabursa.org.

«Прогалина»

В найблизшу неділю в церкви в Радружы на Розточы одбуде ся вернісаж выставы малярства Анджея Жыґадла пн. «Прогалина». Експозиция презентує роботы з циклів: Храм, Церквиско і Деревце, што інспіруваны сут польско-украіньско-лемківскым пограничом і памятю о неістнуючых місцях і спільнотах. Особливе місце заниамт образ «Деревце» з колекциі Руской Бурсы намалюваный артистом перед 10 роками з нагоды упамятнінь 70. річниці акциі «Вісла». Выставу буде мож обзерати до кінця січня/януара будучого рока.