Др Богдан Горбаль одзначеный Президентом Польской Республикы
Лемківскій історик є на функциі председы одродженого Лемко - Союза (The Lemko Association), найстаршой нашой еміґрацийной орґанізациі.
Президент Польской Республикы одзначыл др Богдана Горбаля Кавалерскым Крестом Ордеру Заслугы за выдатны заслугы для захованя, документуваня і популяризуваня спадковины Лемків та за будуваня позитивного образу Польщы в Зъєднаных Штатах Америкы.
Тото цінне польскє одзначыня было передане особисто 20. вересня/септембра вчас слідуючой візиты Презитента др Кароля Навроцкого в Ню Йорку. В тот же ден Президент і Перша Дама Марта Навроцка стрітили ся в Christ the King High School з польонійным середовиском.
«За внеском Ґенерального Консуля Польщы в Ню Йорку, Матеуша Саковича, президент Польщы Кароль Навроцкій одзначыл мене Кавалерскым Крестом Ордеру Заслугы за выдатный вклад в захованя, документуваня і промоцию лемківского дідицтва та за будованя позитывного образу Польщы в Зъєднаных Штатах Америкы. Тото одзначыня отримал єм особисто з рук Президента підчас його візиты в Ню Йорку 20. вересня/септембра 2026 рока» – написал по отриманю оцініна др Горбаль.
В тот ден президент Навроцкій передал оцініня і другым еміґрацийным діячам. Бесідувал, што завдякы такым особам, можливы сут партнерскы реляциі медже Польщом а Америком.
Звертаючы ся до одзначеных осіб, Президент подякувал ім за заслугы для Польской Республикы та для польско–американьскых односин. Звернул увагу, што одзначены репрезентуют полну соспільну мозаіку – особы духовны, што дбают о традицию і віру, едукаторкы та директоркы шкіл, што дбают о язык і достоменніст молодых поколінь, бізнесменів, што осягают бізнесовы і харытатывны успіхы, історика, што плекат тіж реґіональну памят, а тіж представників світа спорту» – інформувано в комунікаті по стрічы на офіцияльным вебсайті польского президента.
Момент отриманя Креста др. Горбальом мож видіти на фільмі (од 12:15 мин.).
Богдан Горбаль
Вродил ся Богдан Горбаль 27. жолтня/октобра 1965 р. в нижношлезскій Сьцінаві, што лежыт над ріком Одром. По роді – до чого в пізнійшым періоді свойой роботы неєднократно вертат – є з Бортного (няньо) і приграничной Мушынкы (мама). Як сын выселенців пришол на світ уж там – далеко од Лемковины, яку його поколіня почувало головно лем з оповідань.
Ліґниця – тото місто было першым – як іде о лемківску активніст. І хоц настал час основаня першой повыселенчой лемківской орґанізациі, был іщы шумный час студентскых анґажів. Богдан Горбаль по скінчыню ІІ загальносвітнього ліґницкого ліцею достал ся на історию на Вроцлавскым Університеті. Уж ту – за студентскых часів – в 80. роках ХХ ст. зачал публикувати своі лемкознавчы дописы.
В єднодньовій ґазеті выдаваній при нагоді першых Лемківскых Ватр в Горах – «Голосі Ватры», в 1988 р. опубликувал допис на тему Руской Народной Республикы Лемків і была то єдна з першых, по вельох роках поминяня через науковців, статій, припоминаюча о державотворчых стремлінях Лемків, Русинів пілнічного боку Карпат періоду по І світовій войні.
Паралельно публикувал статі в підземных антикомуністичных выдавництвах, де зазначал істнуваня лемківского народу. Діял в антикомуністичным «NZS» (Незалежне Здружыня Студентів) во Вроцлаві. Вшытко тото діяло ся в часі, коли был тіж при орґанізуваных од 1983 р. Лемківскых Ватрах, котры горіли до 1989 р.
Был присутный при початках Стоваришыня Лемків, якє офіцияльно было зареґіструване в Ліґници в 1989 р. Його мено находит ся на історичным уж документі – листі з заложытельского зобраня орґанізациі, якє одбыло ся 4. марця 1989 р. в Ліґници.
Од основаня сучасных лемківскых періодичных выдань, реґулярні зачал публикувати історичны статі. Натуральным было, што вказувал ся в выданях Стоваришыня Лемків – «Бесіді», «Лемківскым Календари» і «Лемківскым Річнику».
Тема маґістерской роботы была звязана з його заінтересуванями, пошырил іх в найполнійшым доднес опрацуваню, тыкаючым Руской Народной Республикы Лемків – книжці Działalność Polityczna Łemków na Łemkowszczyznie 1918-1921, котра ся вказала в 1997 р.
Початком 90. років выіхал до Зъєднаных Штатів Америкы. Оборонил в меджечасі докторат на Вроцлавскым Університеті, а потім іщы закінчыл бібліотекознавчы студиі в нюйоркскым Квінс Коледж.
За тот час зрыхтувал вельо статій на темы, якы дотля не были досліджаны. Тримал звязок зо Старым Крайом. Для выдавництв Стоваришыня Лемків описувал біоґрамы заслуженых лемківскых діячів. Його статі доднес сут джерелом цінных інформаций, вказували ся і надале публикуют нп. в «Річнику Руской Бурсы».
Богдан Горбаль то автор чысленных науковых дописів (детальный спис доступный на сайті nypl.academia.edu), котры фурт публикує по анґлицкы, польскы і, предовшыткым, по лемківскы. Єст редактором лемківской части «Енциклопедиі Істориі і Культуры Карпатскых Русинів» (2010, Выдавництво В. Падяка).
Опубликувал більше як сто науковых і популярнонауковых прац, в тым книжкы: з Володиславом Максимовичом Лемківска Народна музыка на восковых циліндрах (1901-1913) і американьскых рекордах (1928-1930) / Lemko Folk Music On Wax Cylinders (1901-1913) And American Records (1928-1930) (2008), Lemko Studies: A Handbook (2010), двотомну богато ілюструвану і документувану моноґрафію Бортне – село з каміня (2017). Єст автором близко 200 опрацувань в: Encyclopedia of Rusyn History and Culture (2002, выд. II поправлене i дополнене 2005), перевюл тіж дакотры тексты до God Is a Rusyn: An Anthology of Contemporary Carpatho-Rusyn Literature, ред. E. Русинко (2011).
Послідня книжка то опрацуваня темы лемківско-американьскых бізнесменів – «Од хыж крытых стріхом до іміґрацийных підприємств» (анґ. From thatched-roof houses to immigrant entrepreneurship, 2024).
Од 1997 р. робит в Нюйоркскій Публичній Бібліотеці. Єст Директором Технічного Перетваряня Науковой, Промысловой і Бізнесовой Части Нюйоркской Бібліотекы (Head of Technical Processing at NYPL’s Science, Industry and Business Library) та Куратором Славяньскых і Східньоевропейскых Колекций Бібліотекы.
Активізує лемківскы еміґрацийны кругы. Предсідателює одродженому Лемко-Союзови, найстаршій лемківскій орґанізациі в Америці.
Ґорлиці 106,6 MHz
Наш порталь можете чытати чысто дармо, але кєд маш охоту - можеш нас спомочы. Буде нам барз мило!
Жебы спомочы нас даком вплатом, без ниякых зобовязань, втисний притиск або зоскануй код QR.
Nasz portal jest darmowy, nie mamy (i nie chcemy) na nim reklam. Jeżeli masz ochotę - możesz wesprzeć naszą codzienną pracę.
Aby wspomóc nas jednorazową wpłatą, bez żadnych zobowiązań, kliknij przycisk lub zeskanuj kod QR.
