Сумар дня на 24. вересня/септембра 2026 р.

Приносиме вам сумар медияльной ґрупы ЛЕМ.фм+ на ден 24. вересня/септембра 2026 р.

Дальшы успіхы «Потопы»

По тым як фільм «Потопа» стал найуспішнійшым фільмом в рамках словацкых фільмовых премій Slnko v sieti, і был номінуваный за Словацку Республику до катеґориі Найліпшый медженародный фільм в рамках Преміі америцкой Академіі Фільмовой Штукы і Знань (Оскары) в ій 99. річнику, котрый одбуде ся в слідуючым році, фільм здобыл дальшы успіхы. В пятницю 18. вересня/септембра гостило братиславскє Štúdio L+S ґалявечер присвяченый 37. річникови передаваня словацкых нацийональных фільмовых і телевізийных оцінінь Igric 2026. Ціну Igric за жіноче акторскє выконаня здобыла Сара Хрипакова, котра грала головну женску ролю в фільмі «Потопа». Нагороду Igric за грану творчіст про кіна здобыл режысер того першого по русиньскы граного фільму Мартін Ґонда. Творчу премію за мужскє акторскє выконаня здобыл Йосиф Пантликаш, якій грал головну мужску ролю в «Потопі». Оцінены были і продуценты обрзу. Специяльне узнаня жырі про продуцентів здобыла Катерина Кырначова і Томаш Ґіч.

О нецілый місяц ґожівскы Стрічы з Лемківском Культуром

Лем што проходила Лемківска Творча Осін, а Стоваришыня Лемків просит на наступну осінню подію. Тым разом ґожівскій Кружок СЛ просит 25. жолтня/октобра на ХХХІІ Стрічы з Лемківском Культуром в Ґожові Великопольскым. Стріча зачне ся о 16.00 год. в Театрі ім. Юлиюша Остервы, до котрого подія вертат по парурічній переві, колиси одбывала ся літньом пором в центрі міста. В рамках подіі выступлят Лемко Тавер Юньор, Карпатія, Дамир та Ансамбль Народного Танця «Малы Ґожовякы». Вступне на подію то 40 зл (мож придбати в касі театру).

Рыхтуваня до ремонту дорогы в Смереківци

Ґорлицкій Староста зачал адміністрацийне поступуваня в справі выданя рішыня, котре дозволило бы на реализацию інвестициі на повітовій дорозі ч. 1496К Ґладышів – Устя Рускє – на одтинку в Смереківци. Плянувана інвестиция обнимат розбудову близко 238 метрів дорогы, розобраня істнуючого мосту і будову на його місци нового. Інвестором є Ґорлицкій Повіт, котрый подал внесок 19. серпня/авґуста 2026 р. Документация была дополнена 7. вересня/септембра. На тырваючым етапі не є знана іщы вартіст інвестициі, термін єй початку і час реализациі. Сам факт, што зачало ся адміністрацийне поступуваня не означат іщы згоды на будову.

Конференция посвячена Низкому Бескідови

Як мешканці ґорлицкого повіту постерігают краєвид Низкого Бескіду і де видят границю медже розвитком а охороном його выняткового характеру? Одповіди на тоты звіданя мож познати уж днес підчас конференциі в Ґорлицкым Центрі Культуры. Стріча проходит од 10.00 год. і орґанізувана єст в рамках шыршого проєкту «Низкій Бескід. Спільный краєвид». Бадачы провірювали, што мешканці реґіону цінят в локальным краєвиді, якы достерігают зміны ци як оціняют розвиток туристикы, нову забудову, охорону культурной спадковины і участ соспільности в підниманю рішынь, што тыкают простору. В проґрамі конференциі заплянувана є презентация результатів бадань та дискусия до звіданя – Ци тратиме краєвид Низкого Бескіду? Панелистами сут узнаны дослідникы і експерты, што репрезентуют ріжны обшыри, м.ін. ґеоґрафы, социйолоґы ци специялисты од туристикы і культурной спадковины. Орґанізатором проєкту є Стоваришыня «Руска Бурса» в Ґорлицях.