«Слово» – 19-та неділя по Сошествії Святого Духа – неділя, 9.00 год.

Ісус Хрістос нам в днешнім слові Євангелія говорить о любви ку неприятелям. Но наперед з той высоты, де нас хоче выздивгнути, сходить долов. А зачінать тым, што є легше прияти. Што хочете, жебы люде робили вам, тото робте і вы їм. А так само: што не хочете, жебы люде робили вам, тото не робте і вы їм.

Но кебы лем тот найнижый ступень сьме прияли до нашого жывота, як бы ся змінив жывот на землі. Кебы сьме памятали хоць лем на тоты слова. Бо каждый хоче, жебы другы робили йому добрі, жебы добрі о нім думали і говорили, а так само не хоче, жебы йому другы не робили зла, не огваряли, не бісідовали о нім плано, не высмівали ся.

А ту Ісус нам гвоорить: видиш, як тобі приємно, коли одношіня другых ку тобі є добре. А тыж як ті є тяжко, коли другы тобі роблять ці фізічне ці псіхічне зло. Но тогды май тото перед очами і в одношіню ку тым другым. Подумай, што ты не хочеш на себе, тото не роб ани другому. А што хочеш на себе, роб і другому.

Є то першый прінціп. Но Ісус нас выводить выцше і указує, же тото є прінціп і у поганів і грішників, покы іде в одношіню ку собі. А нам говорить: Коли любите лем тых, што вас люблять, та яку вдяку за тото чекате? Або кедь робите добрі лем тым, што вам роблять добрі, та яку вдяку за тото чекате? Тадь так роблять і погане і грішникы.

Зато далше нам говорить: Но вы любте своїх не приятелів, робте добрі тым, што вам роблять зло. Але повіме собі, то уж є тажко дотримати, наше еґо, наше самолюбство бунтує ся. Подобно як в Капернаумі, коли говорив а реакція была: тверда то бісіда, та хто то може слухати? Так наше еґо і нам якбы бісідовало: тверда то бісіда.

Но Ісус не оставать лем на тім, же вымагать любов ку неприятелям і робліня їм добро. І указує нам, штось выцше, прекрасне, што превышать і людьске розуміня. Жебы сьте были сынами вашого Отця, котрый є в небі. Ісус нам указує, де нас выводить – до Божого дітинства – быти дітьми самого Бога, Владыкы неба і землі. А мы можеме ся звати Його дітми.

Яке то велике достоїнство. Яка велика почливость. Но Ісус далше продовжать: Бо Він є добрый і ку невдячным і підлым. Є вам тяжко одпущати? Є вам тажко робити добро, кедь ся вам одплачають лем злом? Посмотьте на того, котрый вас прияв за свої діти. Він так легко одпущать, Він так легко робить добро і тым, котры ся з Нього высмівають, не вірять в Нього, гріхами його зневажають.

Так само і нам, коли падеме, як скоро є приготовленый одпущати. Зато Ісус на закончіня того днешнього слова гвоорить: Прото будьте доконалы, як є доконалый і ваш небесный Отець. Все смотьте на Нього! Смотьте на Того, котрого Він послав, на Божого Сына, котрый указує нам приклад. Котрый вісячі на кресті, ку тым, што ся Йому высмівали, у своїм тріумфі сі думали, же побідили на Ним, же уж їм нихто не буде вытыкати їх планы діла, кедь його зневажають і іронічно говорять: Ты, сын Божый, та зыйдь із креста, а мы в тя увориме. Дай нам тоґды доказ. Посмівають ся йому і розбійникы.

А Ісус молить ся за них: Отче, одпусть їм, бо не знають што роблять. Ісус Хрістос уж на тайній вечері говорить ку ученикам і ку нам: Я вам дав приклад. Смотьме і мы на тот приклад і наподобнюйме нашого Отця, котрый є на небі в любви не лем ку тым, котры люблять нас, но і в любви ку тым, котры нас ненавидять і одплачають злом за добро. Слава Ісусу Хрісту!

В неділю, 11. октобра 2026 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 11. октобра 2026 р. о 12.00 год. і 12. октобра 2026 р. о 2.00 год. за русиньскым часом.