Сумар дня на 3. листопада/новембра 2026 р.

Приносиме вам сумар медияльной ґрупы ЛЕМ.фм+ на ден 3. листопада/новембра 2026 р.

Пішо-роверовы трасы вколо Климківкы

Проблемы звязаны з низкым рівньом воды в Климківцi стали ся нагодом до повороту до плянів будовы пішо-роверовой трасы вколо резервуару. Самоурядовці і представникы державных інституций бесідуют о можливостях заґаздуваня околиці. Єдном з головных пропозиций є створіня шляку, котрый міг бы стати ся туристичном атракцийом Бескіду. Згідні з представленом концепцийом траса могла бы мати од 25 до 30 кілометрів і вести не лем вздолж берега озера, але тіж через околичны горы. В плянах єст тіж удоступніня туристам короны запоры. Част трасы по полудньовій стороні резервуару уж істнує, але треба іщы запроєктувати получыня з наступныма одтинками. Більшым выкликом можут ся вказати залісены терены. Iдея навязує до шляку вколо Чорштыньского Озера, котрый причынил ся до розвитку туризму в тамтій околици. Подібне розвязаня могло бы підперти локальны предприємства, ґастрономію і аґротуристикы, а тіж злучыти сусiдны місцевости в більшу сіт пішых і роверовых трас.

«Andy Warhol’s Project» – почуйте автентичный голос Юлиі Вархолы

«Andy Warhol’s Project – Пicні мойой матери Юлиi» то мультiмедияльный концертовый проєкт, котрый приближат русиньскы корені Ендi Варголя через родинну історію і музику. Його основом сут записы русиньскых народных співанок, котры на кінци 70. років ХХ ст. в нюйоркскым студию награла мати артисты – Юлия Вархола. Співанкы походят з Миковы, рiдного села родины Вархолів. Записы были выданы на вінильовiй платни, котру Варголь посылал близкым «до краю» як різдвяный дарунок. Дотепер заховали ся лем два ориґінальны примірникы, а творцям проєкту повело ся здобыти єден з них. Завдякы тому підчас концертів мож почути автентичный голос Юлиі Вархолы. Русиньскы народны мелодиі в новых аранжациях, на граници традицийной i «свiтовой» музикы, представит троє артистів: Мариян Чековскій, Ігор Куцер і Ондрей Кандрач. Товаришыла iм буде оркєстра Emotion Group. Мультiмедияльну част дополнят архівальны знимкы з родинного жытя Варголів, творчіст Юлиі і материялы з турне проєкту в Зъєднаных Штатах Америкы.

Скоро зачне ся сезон полювань Ловецкого Кружка «Маґура»

Ловецкій Кружок «Маґура» в Ґорлицях опубликувал календар колективных полювань на сезон 2026/2027. Заплянувано десят полювань, котры будут проходити од 7. листопада/новембра 2026 рока до 9. січня/януара 2027 рока на обшыри ловецкого терену чысло 202. Полюваня будут ведены в рейонах лісництв Ґладышів, Устя Рускє, Квятон і Білянка. В гармоноґрамі подано даты, місця збераня і особы одповідальны за поєдны полюваня. Інформация єст важна для мешканців i туристів, котры корыстают з околичных лісів. Перед плянуваном выправом вартат провірити календар і в дни полювань тримати особливу осторожніст. Треба звертати увагу на ознакуваня обшыри, а в припадi інформациi о тырваючым полюваню выбрати інчу трасу.

Выстава «Чом ты, хмаро, заздростиш» лем до 29. листопада/новембра

Іщы лем до 29. листопада/новембра мож видіти выставу «Чом ты, хмаро, заздростиш» Давида Здобыляка, котра є презентувана в Інституті Нематерияльной Спадковины Карпатскых Народів в Людзьмєжы. Выстава односит ся до лемківской памяти, достоменности і дідицтва, а тіж до досвідчыня жытя помедже місцьом походжыня родины а місцьом, де ся выросло. Пунктом выходу для артистичной рефлексиі артисты сут родинны істориі самого автора. Наголовок выставы походит з лемківской пісні «В темну нічку в убочы», автором слів котрой є Семан Мадзелян.

Iлюстрация: rusynsk