«Голосы Русинів Підкарпатя» – середа, 18.10 год.

Мы не першый раз бісідуєме з гостьом, в котрім окрем русиньской тече кров другого етноса. Змішаны родины – то шпеціфіка Підкарпатя.

Зато історія Антона Ладані про нас не є яковсь чуднов: няньо – Мадяр, а мамка – Русначка. То цалком тіпічна сітуація. Веце чуднов ту є історія родины желізнічарів Ладані, де потомственный штрекарь Онті став гудаком.

Музична ґрупа «Сонячне Закарпаття», в котром Антон Арпадовіч грав рокы, є знамов у краю. За куртый час тот вокално-інштрументалный ансамбель, у репертуарі котрого фест русиньскых народных співанок, став популарным, а 19-го октобра 2013-го року выпустив діск «Свалявське весілля».

Сам Онті пише співанкы, а дакотры з них уже знамы суть нелем на Підкарпатю – чути їх і за граніцями Стріберной землі.

Слухайте «Голосы Русинів Підкарпатя» в середу 4-го новембра 2026 р. о 18.10 год., або повторіня в четверь 5-го новембра о 4.30 год. і в суботу 7-го новембра о 11.00 год. за русиньскым часом.