Пряшівска жупа хоче тіснішу співпрацу із Польщов. Має выникнути Реґіонална пятка

Довгорічне успішне партнерство в словацько-польскім пригранічу діставать новый страґеґічный імпулз. Як інформовала Даша Єленьова, говоркыня Пряшівского самосправного краю (ПСК), представителі ПСК і Малопольского воєводства на престіжній події Krynica Forum 2026 представили пропозіцію про далшый розвиток пригранічной теріторії.

Їх цільом є створити такзвану Реґіоналну пятку – унікатну платформу трьох польскых і двох словацькых реґіонів про конкретну і сістематічну співпрацу.

Розвиток словацько-польского пирграніча буде продовжовати вдяка проглубліню довгодобой співпраці. Потвердили то представителі реґіонів на події Krynica Forum 2026, де ся добісідовали на сполочных кроках заміряных на підпору пригранічных областей.

Ключовым заміром має быти вытворіня такзваной Реґіоналной пяткы – новой платформы, котра буде капчати Пряшівскый і Жіліньскый самосправный край із Словакії, і Малопольске, Слезьске і Підкарпатьске воєводство із Польщі.

Тему Реґіоналной пяткы на форумі одкрыли підпредседа ПСК Штефан Біеляк, і верьховны представителі Малопольского воєводства – маршалок Лукаш Смолка і віцемаршалок Вітолд Козловскый.

Згодны были в тім, же нова платформа бы помогла посунути сполочны теріторії допереду посередництвом высшой реґіоналной автономії, акціїспособности і розвиваня довгодобого партнерства.

„Суть темы і проблемы, котры мають нелем локалный черезгранічный досяг, але дотулюять ся цілого приграніча. Сполочным цільом є ліпше транспортове перепоїня, векша безпека жытелів і ефектівніша охрана водных жрідел. Єднако важны суть области, котры дотуляють ся молодых людей ці підпоры сел,“ повів ку новій ініціатіві пряшівскый жупан Мілан Маєрьскый.

Задумана тісніша співпраца пятьох пригранічных реґіонів потверджує, же будучность Европы формує ся посередництвом реґіоналной інтеґрації, інформовала говоркына ПСК Даша Єленьова.

Економічный форум в Криниці проходив 27-го і 28-го октобра 2026-го року. Зышли ся там стовкы лідерів із области бізнісу, політікы, наукы, містных самосправ, як і представителів медій і фаховой комуніты.

Фото: ПСК.