«Слово» – 23-тя неділя по Сошествії Святого Духа – неділя, 9.00 год.

Ісус Хрістос кажде діло і слово напрямує ку нашому хосну і спасіню. І днешня подія з Євангелія указує як Бог приходить ослободити чоловіка з рабства діавола.

Коли Ісус зо своїма учениками пришов до ґадариньского края, вышов оперед нього єден чоловік, котрый мав в собі нечістых духів. Його перша реакція, або скорше реакція злого духа, котрый опановав його тіло была: што тобі і нам Ісусе, Сыне найвысшого Бога, прошу тя не муч мене. Но, коли чітаме днешнє слово, там не видиме, нияке мучіня того чоловіка зо стороны Ісуса. Но є там інше мучіня, мучіня послухняности.

Діавол, котрый на початку збунтовав ся проти Бога словами не буду служыти не буду ся кланяти, теперь чує слово свого Сотворителя і Судцю і мусить ся повиновати. А тото є про злого найвекша мука, коли мусить послухати. Тото є про нього мука. А так просить Ісуса, жебы їм доволив войти до стада свинь. А Ісус їм то доволює, но не зато, жебы выповнив волю діавола, але жебы указати, як діавол ненавидить Боже сотворіня, а окреме чоловіка, і хоче його цілкове зничіня в пеклі.

А Ісус тото одкрывать, коли доволює войти до свинь а ціле стадо ся верьгло долов і потопило ся у воді. Пастырі поутікали і звістовали вшыткым: подьте, посмотьте на чоловіка, котрый быв перед тым опановаъный демонами а теперь сидить при Ісусовых ногах. Народ вышов а коли увидів того чоловіка, котрого не могли звязати ланцами, но видять, же мать теперь рукы вольне, заодітый до плаща і сидить покійно коло Ісуса.

Народ быв охопленый великым страхом і просять Ісуса, жебы одышов з їх краю. А Ісус пришов і насів зо своїма учениками до лодькы, жебы ся побрав гет од тых, котры го не хотіли. Но тот чоловік просить Ісуса, жебы міг быти з ним. Але Ісус йому то не доволив. Наказав йому вернути ся домів, і оголошати, што йому Бог зробив. А він всягды оглошовав, што йому Ісус зробив.

Ісус його посылать ку його домашнім і близкым, жебы оголошав. Робить го апостолом. Як великый розділ в його жывоті перед тым, як познав Хріста, быв у рабстві діавола, теперь коли ся стіритв з Хрістом, быв ослободженый спід влады діавола. Каждый день оголошав радостну новину, і што йому Бог зробив.

Тото є напомянутя і про нас. Може і мы сьме прияли ослободжіня од рабства діавола через даякый гріх, або завислость на алкоголі, наркотіках, циґаретлях, або на тілесных роскошах. А через покаяня сьме і мы прияли слободу. І ку нам говорить: верний ся домів і оглошай, што тобі Бог зробив. І мы сьме покликаны так робити в нашій родині, школі ці в роботі. Наслідовати приклад того чоловіка: Він ішов і оголошав, што йому Ісус зробив. Слава Ісусу Хрісту!

В неділю, 8. новембра 2026 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 8. новембра 2026 р. о 12.00 год. і 9. новембра 2026 р. о 2.00 год. за русиньскым часом.