Приносиме вам сумар медияльной ґрупы ЛЕМ.фм+ на ден 18. листопада/новембра 2026 р.
В селі Розстайне посвятили каплицю
В минулу суботу, 14. листопада/новембра, о 11.00 год. в Розстайным прошло посвячыня капличкы під покровом святых Космы і Даміяна, яку побудувано на місци церкви. Святыня, коли бракло мешканців села, была в 1951 році розобрана. Каплицю посвятил митрополита Євген Попопович, владыка грекокатолицкой перемышльско-варшавской єпархіі. В торжестві участ взяли чысленны духовны і вірны з Польщы, Словациі, Украіны та ЗША. Деревяну каплицю на давным церквиску уфундувал Михал Хомик зо Святковы Малой, котрый по 30 роках жытя в Зъєднаных Штатах Америкы рішыл вернути до краю. Обєкт має припоминати історию села, котрого уж ніт, і його давного храму, а тіж быти подякуваньом за щестливе жытя фундатора.
– бесідує Михал Хомик.
Нова атракция в Маґурскым Парку
На обшыри Маґурского Нацийонального Парку буде зреализуване нове місце для туристів – то едукацийна стежка «Прогулька в деревах». Проєкт закладат будову трасы на высокости, жебы уможнити познаваня ліса з перспективы корон дерев. Додатковыма елементами будут мотузовы мосты і хыжкы поміщены на деревах. Переходы будут ся находити пару метрів над земльом, а в некторых місцях аж і на высокости 10 метрів. Підчас прогулькы буде мож познати сліды звірят, котры выступуют в парку, дітхнути ріжны ґатункы дерев, схоснвуати дендрофон (значыт інструмент зробленый з деревяных елементів), а тіж обзерати дерева, хоснуючы специяльны калейдоскопы. Маґурскій Парк оголосил конкурс оферт на запроєктуваня і реализацию інвестициі. Оферты мож складати до 26. листопада/новембра. Проєкт реализуваный буде в Фолюшы, де уж тепер находит ся єдна з едукацийных стежок Парку.
– бесідує Норберт Кєць, директор Маґурского Нацийонального Парку
Запрошыня на бесіду в рамках фокусовой ґрупы
Припоминаме, што в найблизшый четвер в Рускій Бурсі в Ґорлциях о 17.00 год. одбуде ся выклад Даміяна Новака пн. «Gorlicia Ruthenica. Слідами Лемків в передвоєнных Ґорлицях», натоміст по выкладі запрашаме до участи в бесіді нт. розвитку і будучности самой бурсы. Бесіда позволит ліше зрозуміти потребы осіб, котры хоснуют оферту Бурсы, як видят тото місце в наступных роках, чого ім бракує і што бы хотіли, жебы ся змінило в діяльности осередка. Запрашаме вшыткых заінтересуваных!







