Новы высокошкольскы учебникы із русиністікы

В тых днях Пряшівска універзіта в Пряшові выдала 7 новых высокошкольскых учебників про штудентів бакаларьского і маґістерьского штудійного проґраму русиньскый язык і література, якы але будуть мочі послужыти і шыршому кругу вжывателів русиньского языка, лінґвістам, ученым в іншых сферах русиністікы ці славістікы і каждому, кого інтересує русиньскый язык, його історія, діалектолоґія, література (теорія і літературна крітіка), култура і історія каратьскых Русинів.

Їх авторами суть учітелі Інштітуту русиньского языка і културы ПУ: ПгДр. Кветослава Копорова, ПгД. – Фонетіка, фонолоґія і акцентолоґія русиньского языка (РЯ), доц. ПгДр. Василь Ябур, к. н. – Морфолоґія і сінтаксіс РЯ, доц. ПгДр. Анна Плішкова, ПгД. – Лексіколоґія і словотворіня РЯ, проф. ПгДр. Юлія Крішшакова-Дудашова – Vývin rusínskeho jazyka a dialektológia, др. н., доц. ПгДр. Андрій Антоняй, к. н. – Вступ до теорії літературы і літературной крітікы, Мґр. Валерій Падяк, к. н. – Історія карпаторусиньской літературы і културы, і ПгДр. Станіслав Конєчный, к. н. – Náčrt dejín karpatských Rusínov.

Учебникы были написаны і выданы в рамках проєкту „Зліпшіня языковых компетенцій штудентів Пряшівской універзіты в Пряшові в языках народностных меншын“. Проєкт быв підпореный Европскым соціалным фондом посередництвом Операчного проґраму „Освіта“.

Жрідло: www.new.rusynacademy.sk

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА