«Bieg Wyzwanie Łemkowskie» – неодолга на Лемковині

Лемковина як одкрыта обшыр, выполнена природом, з лісами, путями, гірками, од долшого часу є експлюатувана через вшелеякы спортовы дисциплины. По Бескіді мож іздити біциґльом, в зимі іздити на нартах, зачынаючы од тых ходженых, а кінчучы на істо екстремальных зъіздах. Але Лемковина притігат тіж проводити змаганя в літаных спортах. Єдны з них – добрі уж знаны – котры выробили сой властну марку сут змаганя «Лемковина Ультра Трейль».

Такых видів активного одпочынку єст більше, понеже неодолга на Лемковині пройде І част другых змагань «Bieg Wyzwanie Łemkowskie». Орґанізатором подіі є Фундация Про Спорт, котра заплянувала в 3 ріжных термінах, аж 3 ріжны трасы. Перша част пройде 3. квітня/апріля т.р., в Лоси, друга – 26. червця/юнія т.р, в Высові, а третя о нецілых пят місяців, 9. жолтня/октобра т.р., в Квятони.

Проґрам першой части, котра одбуде ся уж неодолга в Лоси, передвиджує 13,5 кілометрову трасу, котра веде через красний, гірскій простір. Од 10.00 год. одбуде ся выдаваня стартовых номерів і дальшы записы, пак од 12.00 год. одбуде ся старт лосяньскых змагань (передвиджений час – ок. 3 год.). Пак запланувано спільну ватрочку з почастунком.

Цілю імпрезы є головні промуваня активного стилю жытя, меджеґенерацийна інтеґрация та промоция малопольского воєвідства, в тым локальных лемківскых сел і поблизкых лісів. Вписове в терміні 2016.03.01 – 2016.03.30 коштує 80 зл, пак од 2016.04.03 ціна побільшыт ся до 100 зл. Оплата з горы за цілий цикль змагань выносит 150 зл. За тым мотузком можете ся записати.

Більше інформаций і реґулямін змагань «Bieg Wyzwanie Łemkowskie» – за тым мотузком. О дальшых подіях будеме інформувати.

Долов, відеокліп промуючий подію.

https://www.youtube.com/watch?v=sVNGk03-GCw&feature=youtu.be