Оціна з лемківского на свідоцтві серед оцін обовязковых едукацийных предметів

Міністерство Народовой Едукациі в Польщы хоче змінити переписы, якы односят ся шкільных свідоцтв, державных грамот, або інчых шікльных друків. Єдном зо змін мат быти упорядкуваня вписуваня оцін з предметів, якы дотепер не підлігали ниякым законам.

Згідні з думком проєктодавців, на шкільных документах мают явити ся клясифікацийны оціны з занять: реліґіі/етикы, языка нацийональной/етнічной меншыны, або реґіонального языка та свойой істориі і культуры даной меншыны, або реґіональной соспільности.

Дотеперішній брак консеквентных переписів знеохочал особы, якы хотіли мати державне посвідчыня набытых компетенций. Новы переписы мают довести до того, же назва предметів языка нацийональной, або етнічной меншыны та реґіонального языка вписуваны будут в місци перезначеным для обовязковых едукацийных занять, а не – як дотепер – під сподом той же листы, в додатковым місци, як оціна з додаткового предмету. Там буде вписувана оціна з едукацийных занять з істориі і культуры нацийональной, або етнічной меншыны, ци реґіональной соспільности.

Упорядкована мат быти тіж справа участи, або його браку на занятах з реліґіі, або етикы, бо тот проблем был уж вельократні зголошаний. Переписы дозваляют на три можности:

• ученик не учащат на ниякы з тых занять,
• ученик бере участ в єдным з предметів,
• ученик бере участ в обох занятях: реліґіі і етикы.

Учытель в першым примірі буде ставлял горизонтальну криску. В другым – буде вписана оціна без названя предмету, котрого тыкат. В остатнім примірі – ученик достане дві оціны, якы будут записаны так, жебы свідоцтво было оддзеркаліньом аркуша оцін ученика і документом, якій посвідчат вшыткы осягніня.

Проєкт змін находит ся на етапі консультаций.

фот. Брошура для родичів печатана Міністерством Адміністрациі і Цифризациі в рамках промоцийной акциі про вчыня языка меншын і реґіонального языка.