Вшыткых Русинів запрашаме до Біловежы

Свято русиньскых будителів А. Духновіча і А. Павловіча є назва 36-го річника русиньского фолклорного фестівалу у селі Біловежа в Бардейовскім окресі, котрый буде проходити в неділю 26-го юна 2016-го року.  Орґанізаторами свята є село Біловежа на челі із старостом Петром Мікулом, інакше член Выконного выбору Русиньской оброды на Словеньску, председа єй Містной орґанізації у Біловежі, актівный русиньскый діятель, пропаґатор і збератель малярьского кумшту русиньскых авторів, Русиньска оброда на Словеньску і Вышньошарішскый освітній центер у Бардейові.

Цілоденный проґрам свята зачне о півдесятій годині дообіда ґрекокатолицьков святов літурґіов у церьковнославяньскім языку в сельскім храмі, де будуть співати многы співацькы ґрупы, котры придуть выступати на фестівал. По літурґії, на дворі перед сельсков парохіов, де з ініціатівы Окресной орґанізації РОС на челі з єй бывшым председом Іваном Бандурічом была в 1995-ім році уміщена памятна табла русиньскым будителям Александрови Духновічови і Александрови Павловічови, котры у Біловежі жыли і діяли, будуть нашы люди споминати на тоты рокы, через котры у селі проповідали, учіли і діяли нашы вызначны великаны – Духновіч і Павловіч.

Потім од фарьского уряду кройованым походом підуть вшыткы выступаючі гудаци і співаци, орґанізаторы, гості і многы участници свята співаючі на сельскый амфітеатер, а то як жыва пропаґація і запрошіня на далшый проґрам красного свята. На сцені амфітеатра, окрем домашніх діточок, школярів і Біловежанкы, выступлять колектівы і співацькы ґрупы – Барвінок із Камюнкы, Йозеф Мак із Баньской Быстріці, ґрупа Фатьови із Мукачева, Шамбрінці зо Шамброна, дуеты Л. Чушкова і М. Чічвакова з Біловежы, І. і М. Карашовы з Камюнкы, Стефані Ковачова з Ортутовой, співацькы ґрупы Вінок із Шарішского Ястрабя і ґрупа Мелоді при Готеловій академії Я. Андращіка в Бардейові, а на завершіня красного свята выступить і наш професіоналный колектів ПУЛС із Пряшова. Модераторьскым словом цілого проґраму свята буде провадити Штефан Гій, бывшый артіст Театру Александра Духновіча і родак з Біловежы. Частьов події буде выставка історічных фотоґрафій із села Біловежа і образів із русиньсков тематіков.

Подія реалізує ся із фінанчнов підпоров Уряду влады СР – проґрам Култура народностных меншын 2016 і Пряшівского самосправного краю.