Райд «Петля Попраду» в русиньскых селах

Днес (13.08) о 10.00 год. з Мушыны стартує V Камеральний Польско-Словацкій Біциґльовий Райд «Петля Попраду», котрий переіхат м.ін. через русиньскы/лемківскы села західніх краів Лемковины і Пряшівской Руси, положены при Попраді. Траса поділена єст на 4 етапы, долгіст райду то 42 км, а кєд дахто з участників хотіл бы заіхати на специяльны одтинкы, зрыхтуваны на каждым зо штырьох етапів, переіхат вшыткого 56 км.

Зачынаючы од Мушыны, біциґлисты, котры од марця т.р. могли ся приголосити до участи, поіхают в сторону Лелюхова, пак, ідучы через Вышеградскій Міст, будучий границьом Польщы і Словациі (ту кінчыт ся І етап райду), лишат ззаду Руску Волю, переіхают недалеко Чырча і головном дорогом підут в сторону Любовняньской Долины – до Плавниці, де скінчыт ся ІІ етап. В тым місци участникы з Польщы стрітят ся зо словацкыма любителями біциґльовых спортів, котры ідут окремым райдом, і разом поіхают до Малого Липника, де спільно ся погосят при ґрілю. З Малого Липника польскы участникы підут русиньскыма селами Старина і Леґнава назад до Мушыны, а словацкы – через Сулин до Старой Любовні.

Цілю V Камерального Польско-Словацкого Біциґльового Райду «Петля Попраду» являт ся популяризация біциґльовой туристикы і атракций польско-словацкого погранича в околицях міста Мушына.