Забыткы на карпатскых пустатынях – вернісаж выставы в Ряшові

В рамках тогорічных Европейскых Днів Дідицтва, празднуваных в підкарпатскым воєвідстві в Польщы, в найблизшу неділю 18. вересня/септембра в Ряшові буде мож взяти участ в вернісажы выставы пн. Забыткы на карпатскых пустатынях. Свою премєру тота выстава мала в марци того рока в Варшаві.

Єст то выстава, на якій видіти мож знимкы з неґативів і фотоґрафічных одбиток, зробленых вчас вельолітніх інвентаризаторскых і консерваторскых робіт, веденых Барбаром Тондос і Єжы Туром в 50. роках минулого столітя на обшыри давного ряшівского воєвідства (його засяг обнимал товды теперішню обшыр цілого підкарпатского воєвідства і ґорлицкого повіту – т.є. велику част Лемковины). Вчас вернісажу о роботі і жытю своіх родичів оповідала буде Катажына Тур-Марцішук, історик штукы.

Єжы Тур был воєвідскым консерватором забытків, істориком штукы, специялистом в обшыри деревяного церковного будівництва. Разом з женом, тіж істориком штукы, Барбаром Тондос, занимали ся інвентаризацийом і зберіганьом церкви і церковного майна в опустошеных через выганяня селах ряшівского воєвідства. Завдякы іх роботі было захороненых перед абсолютным знищыньом около парох тисячів елементів выпосажыня цекрви. Част з них мож обзерати на експозициях Музею-Замку в Ланцуті, а част была передана потребуючым парохіям в пізнійшым періоді, напр. ориґінальний іконостас вернул до церкви в Котани, а інчий был переданий до Вільхівця.

В дальшых пунктах проґраму ряшвіского празднуваня Европейскых Днів Дідицтва єст іщы м.ін. прелекция Анджєя Жыґадлы про деревяний храм в Лежахові і концерт реліґійных пісен в ывыконаню Юлиі Дошни.

Подіі проходити будут в Етноґафічным Музею ім. Ф. Котулі (Ряшів, Рынок 6) од 12.00 год.