ХХІІІ Лемківска Творча Осін – знимкы з Камяной (фото: Петро Басалыґа)

ХХІІІ Лемківска Творча Осін, котра проходила в дн. 17.-18. жолтня/октобра т.р., то уж істория. Писали сме о тій подіі на нашым портали вчера (чытайте за мотузком), в тій же статі находит ся ґалерия знимок з другого дня Осени, котрий традицийні одбыват ся в Рускій Бурсі в Ґорлицях.

Лемківска Творча Осін то не лем нагода на стрічу літератів, річницьовы спомины о выдатных Русинах, як 100. років од смерти Миколая Малиняка, котрому была посвячена тогорічна Осін, але і сентиментальны подорожы, як в примірі поеты з Украіны – Анатолия Ядловского, котрого корені сігают Камяной – села, де проходил перший ден стрічы. Сентиментів было більше, понеже і отец Ярослава Горощака (автора першого лемківско-польского і польско лемківского словника) был в Камяній крещений, коли білцарівскій парох, о. Теофіл Качмарчык, был – як і спомнений Миколай Малиняк – інтернувний в талергофскым лаґрі (о Івані Горощаку бесідує сын Ярослав; слухайте кавалец інтервю пониже):

Днес – приносиме Вам знимкы з Камяной, авторства выдатного фотоґрафіка, Петра Басалыґы, долголітнього спілпрацівника двомісячника Бесіда, за котры авторови сердечні дякуєме.