Духновичів Пряшів 2015 – днес в Театрі А. Духновича в Пряшові!

Днес о 9.00 год. в пряшівскым Театрі Александра Духновича одбуде ся 16. едиция конкурсу Духновичів Пряшів 2015. То конкурс деклямациі русиньской поезиі, прозы, власной творчости, малых сценічных форм і народного розповіданя, котрого єдным з медияльных партнерів являт ся і радийо ЛЕМ.ФМ.

В тогорічній едициі запрезентує ся понад 60 декляматорів, в шестьох віковых катеґориях – од наймолодшых в предшкільным віку аж по дорослых, а оцінювати іх будут: Яна Трущыньска Сива, Мариян Марко, Ігор Латта, Мария Джоґанова і Петро Медвідь.

Найбільше участників запрезентує ся в поезиі і прозі (о конкурсовых катеґориях писали сме в статі за тым мотузком), осмеро в катеґориі власна творчіст, двоє в народным розповіданю, а катеґорию малых сценічных форм выполнят три театральны ансамблі з основных шкіл з Чабин, Пчолиного і Шаришского Ястрабя.

Окрем признаня поєдных місц в каждій з катеґорий, головний орґанізатор – Русиньска Оброда на Словациі – выголосит Лавреата Духновичового Пряшова 2015, котрым остане найліпший декляматор тогорічной едициі.

Придте і ВЫ послухати, видіти і горячо допінґувати участників конкурсу Духновичів Пряшів 2015, котрий одбуде ся в просторах єдиного во світі, професийонального русиньского театру – Театру Александра Духновича!

(інформацию прислала п. Анна Кузмякова – красні дякуєме!)