Выріжніня для путівника по Лемковині

В остатніх днях, то єст од 27. до 30. жолтня/октобра, в Кракові проходили ХХ Выставовым Ярмаку Книжкы, на котрым зо своіма выдавництвами презентували ся десяткы выставців. Традицийні, попри перегляді самых книжок, проходили товаришучы подіі, як напр. стрічы з авторами ци выставы.

Єдном з такых подій было розвязаня першого конкурсу на Найліпше выдавництво о горах, орґанізуваного Центральным Осередком Гірской Туристикы ПКТТ та Выдавництвом Карпаты Анджей Лончыньскі. До 20. вересня/септембра треба было зголошувати альбомы, путівникы, моноґрафіі, популярно-науковы выдавництва, книжкы з позеийом ци мапы і атлясы, посвячены шыроко понятій гірскій темі (горы Польщы і світа), якы печатаны были в роках 2014-2016.

Розвязаня конкурусу проходило в перший ден Выставового Ярмаку Книжкы – в  четвер 27. жолтня/октобра. Серед нагородженых были выключні позициі тыкаючы Карпат, а головні односячы ся до Татер, пару тыкаючых Бєщадів, але серед выріжненых нашли ся і дві публикациі, котры своім змістом односят ся до Низкого Бескіду. Першом єст біциґльовий путівник авторства Романа Тжмєлевского пн. Низкій Бескід на ровері, печатаний выдавництвом Компас. Другом – туристичний путівник Низкій Бескід. Од Команчы до Высовы авторства Бартломєя Вадаса, Томаша Трачыка і Вітольда Ґжесіка. Тоту книжку выдал Склеп Подружніка. Не єст то перше выріжніня для той публикациі. В маю т.р. путівник по Лемковині был єдным з лавреатів в конкурсі Нагороды Маґеллана, орґанізуваного редакцийом «Літерацкого Маґазину Книжкы».

Путівник Низкій Бескід. Од Команчы до Высовы, то найліпший путівник по Лемковині. Чыслыт аж 500 сторін, на котрых поміщено істориі вшыткых істнуючых або неістнуючых сел на трасі од Команчы до Высовы. Єст він другым, пошыреным выданьом путівника Низкій Бескід. Од Команчы до Бортного, якій был першым (печатаний был на початку 90. років ХХ ст.) так обшырным і докладным путівником, описуючым нашы землі, котрого цілю был стрікте історичний підхід до темы. В путівнику найдете богаты історичны описы, збогачены о інформациі з архівальных документів та реляций списаных зо споминів і бесід з людми, корінныма жытелями лемківскых сел.