Іщы раз на «Лемківскым Йордані» (третя част) – проґрам «70 процент» – субота, 20.00 год.

…Все думала єм, же во вертепі было кус некомфортні: студін, невыгода, ани пеца, ани стола, ани постелі. Зато і маціцькій Ісуско в загальні знаній коляді, жебы кус поліпшыти своій мамі тоты обставины, летит до раю по перину, очывидні, з ангельского піря… Але коли пришла єм до Тернополя на «Лемківскій Йордан», мала єм несподіванку. Бо почула-м тоту коляду од тріо з Чорткова уж без перины. В чортківскій інтерпретациі Боже Дітя рече, же піде до раю, жебы… принести ялину! Видно, Святій родині во вертепі акурат барз забракло яличкы. Бо як святкувати Різдво без різдвяного деревця?!

…Все, як підеш медже люди, дознаш ся кус нового. І хоц мы уж гнеска третий раз на «Лемківскім Йордані», думам, же і вы почуєте дашто нове ци з пісні, ци з бесіды.

На маленькій знимці справа ― Ігор Вовчак, на великым фото видите «Лемківскых гудаків» ― Ярослава і Миколая Ґарберів, а на тоттм, што згоры, видите, як файні ся танцує, як до танця пригрывают Ґарберы.