Варгольовий Мао проданий за $11.000.000

Як інформували сме скорше, початком квітня/апріля т.р. в Лондоні (в Авкцийным Домі Сотбі) проходила ліцитация єдного з образів Енді Варголя. Подля інформаций поданых пресаґенцийом Ройтерс, портрет был куплений за 65.7 млн гонґконґскых дулярів, што єст новым рекордом, кєд іде о продаж західньой сучасной штукы в Азиі.

В 1972 році президент ЗША Річард Ніксон был з візитом в Кытайскій Народній Республиці. Дала она початок дипльоматичным реляциям медже обома державами. Рік по тій візиті, Енді Варголь, по осмох роках перервы зачал працувати над серийом портретів Мао Зедонґа, начальника кытайской державы. Єден з них осягнул на спомненій авкциі, 2. квітня/апріля, рекордову ціну 11 млн американьскых дулярів.

Образ Мао трафил до анонімового колекцийонера з Азиі. Портрет был остатньо продаваний три рокы тому в Лондоні, його вартіст за тот час збільшыла ся о більше як 20%. Товды продано го за 9.2 млн дулярів.

Хоц з початку може ся явити дивным, же Варголь задумал заняти ся портретуваньом комуністичного вождя, мож речы, же і тото вписувало ся в творчий маніфест Енді – хотіл вказати тым, же заквестийонувати в комерцийний, консумпцийний спосіб мож вшытко і вшыткых, ачий ведучого комуністичной державы. Мультіплікация портретів (часта техніка хоснувана Варгольом), была додатковым высміяньом масовости і репродукциі кєруваной комуністичном партийом.

Образ Мао проданий на недільній авкциі єст єдным з сериі 28 серіґрафік і олійных образів з видом Мао, котры Варголь зробил в 1973 році. Портреты зробил Варголь на основі найбарже популярного виду Мао Зедонґа. Вшыткы одтворіня представляют вышню половину кытайского начальника – од пояса вгору, облеченого в іконоґрафічну куртку, запинану на ґузікы. Знимка взята была з книжкы Цитуваня з Проводира Мао, называной на Заході Червеном Книжочком. Што цікаве, образ, якій вісит при брамі до Заборненого Міста в Пекіні, тіж был намалюваний на основі той самой фотоґрафіі.

Варгольовий Мао єст першым зо спомненой сериі 28 серіґрафік вождя, якій был куплений на кытайскій земли. На тій же авкциі Дом Сотбі продал іщы двох інчых Маосів, але уж авторства кытайскых артистів – Ванґа Ґуангі та Лі Вей.