Варгольовий Мао – за кілько тым разом буде проданий?

Енді Варголь то непересічний артиста, котрий часто з ничого робил діло. З його творчости знаме хоц бы вынятковы ґрафікы баньок поливкы Campbell’s ци найпопулярнійшого в цілым світі напитку маркы Coca-Cola. Варголь знаний є з того, же часто до своіх малюнків брал найпростійшы річы штоденного хосну, якы товаришыли жытю нормальных Американів (прим. зупы, напиткы, бананы і др.). Його творчіст операла ся тіж на промуваню великых автомобільных марок (выстава його авт одбуде ся неодолга в Москві), але тіж обєктом його артистичных візий были річы, котры в шыршым виді не сут ничым вынятковым. Так, в його творчости находиме і проєкты черевіків (ескізы Варголя з том частю його творчости нашли купця, якій годен был заплатити за них більше як 400 тис. дулярів).

Варгольовы таланты проявляли ся і в інчым просторі. Просторі, якій вказувал (на тамтот час) великых і могучых земного світа. Найбарже знаны сут выстилізуваны портреты звізд поп-культуры, т.є Мерілин Монро, Ельвіса Преслі, Елізабет Тейлор ци жены американьского президента – Жаклін Кеннеді. Король поп-арту не заперал ся лем в американьскым світі в його шырокій сериі найдеме тіж портреты великых комуністичного світа – Леніна та Мао Зедонґа.

Портрет того остатнього – комуністичноиго кытайского диктатора, буде 2. квітня/апріля т.р. выставлений на аукцию в місті кытайского бізнесу – Гонґконґ. Експерты рахуют, же портрет Мао може быти проданий аж за 15 млн $. Теперішній властитель купил образ в 2014 році на аукциі в Лондоні за 9,4 млн $. Додайме, же портрет того знаного кытайского диктатора был Варгольом зроблений на основі знимкы Мао, поміщеной в тзв. Червеній книжочці – збірці його цитатів і офіцияльных ідеолоґічных выступлінь, яка мала служыти за основну книжку для каждого кытайского громадянина.