Засіданя Світовой Рады Русинів в Хорвациі

Од спомянутя на жертвы войны в бывшій Югославіі з початку 90. років минулого столітя, зложыня квітя і запаліня свічкы при таблици, поставленій в чест «хорватскых оборонців» в Старых Янковцях в Хорвациі, зачало ся засіданя Світовой Рады Русинів. Было то остатнє засіданя перед XIV Світовым Конґресом Русинів, котрий буде проходил в Осієку в днях 29. юнія/червця – 2. юлия/липця 2017 р. Члены СРР приняли проґрам конґресу. Покровительсто над XIV Світовым Конґресом Русинів приняла президент Хорвациі, Колинда Ґрабар-Кітаровіч. Принято, што вчас конґресу пройдут пленарны засіданя, присвячены справодаваню, проґрамови діяльности, выборам предсідателя СКР і змінам до статуту. Плянуваны сут і засіданя конґресовых комісий:

• культурной,
• про історию Русинів,
• про освіту,
• про інформуваня і выдавничу діяльніст,
• про ґранты (званой і економічном комісийом),
• про молодіжны спортовы змаганя,
• статутовой.

Окрем засідань і роботы в комісиях, головний орґанізатор конґресу, котрым являт ся Дружство Руснак, рыхтує і культурний проґрам і опроваджаня по Музею Славоніі в Осієку.

Вчас засіданя СРР в Старых Янковцях проходили паралельны засіданя культурной комісиі, котра дала пропозицию кандидата до нагороды ім. Василя Турока-Гетеша, та статутовой комісиі, котра приняла пропозициі змін до статуту СКР, якы буде пропонувала схвалити делеґатам вчас конґресу.

По засіданях рады одбыл ся концерт, в котрым выступили ученикы русиньского языка, ґрупа презентуюча фольклор Мадярів з Хорвациі і гости з Підкарпатской Руси.