Поломництва на Святу Гору Явір

Традицийно в липци/юлию проходят поломничества на Святу Гору Явір – до найславнійшого русиньского путницкого місця на пілнічным боці Карпат. Гору Явір одвиджают вірны так православной, як і грекокатолицкой Церкви.

Православне поломництво на Святу Гору Явір повязане є з праздником свв. Апостолів Петра і Пaвла (12. липця/юлия за юлияньскым календарьом), котрий кінчыт час Петрового посту. Головным орґанізатором штырьодньового двадцет семого уж поломництва є Братство Православной Молодежы Перемышльско-Ґорлицкой Єпархіі. Зачне ся оно од Божеской Літургіі в церкви св. Миколая в Зындранові, яку очелит владыка Паісий. Поломникы медже 09.-12. липця/юлия перейдут через такы села як Зындранова, Тылява, Святкова Велика, Бортне, Воловец, Ґладышів, Реґєтів, Ганчова, Высова, та конец-кінцьом дійдут на гору Явір над Высовом. Подібні як в попередніх роках поломникы пристанут в Ганчові на Всеночну, попереджаючу праздник, котра буде правлена в храмі Покровы Пресвятой Богородиці. О ден, перед выходом на Святу Гору, в высівскій церкви св. Михала одбуде ся короткє богослужыня. В Зындранові по Божескій Літургіі буде одслужена панихіда за жертвы акциі «Вісла». Детальнійшы інформациі та записы найдете за мотузком.

Початок грекокатолицкого поломництва заплянувано на 20. липця/юлия. Товды же поломникы, по выході з грекокатолицкого храму свв. Петра і Павла в Креници (поч. Божеской Літургіі о 8.00 год.), підут ґу Высовій через такы русиньскы села як Мухначка, Баниця, Чертіжне, Ріпкы та Ганчову. Служба Божа і процесия (наперед о 9:30 буде служений Молебен до Пресвятой Богородиці) на Горі Явір одбудут ся наступного дня, в пятницю 21. липця/юлия. Більше інформаций найдете на тым сайті.

Гора Явір то не лем символичне місце для реліґійных Лемків, але і місце глубоко вписане в нацийональну свідоміст жытелів Лемковины. Парунадцет років, на ниві спору о деякы лемківскы храмы, тырвал судовий процес о правну властніст каплиці на Святій Горі Явір помедже Польском Автокефальном Православном Церквю та Украіньском Грекокатолицком Церквю в Польщы. Того рока властніст каплиці припала остаточні УГКЦ. Православна Церков є властительом ділянкы на лівым боці од каплиці, де уж были правлены першы богослужыня.