На Сниньскых рыбниках проходить русиньскый табор

В рекреачнім ареалі Сниньскы рыбникы в Снині проходить од 20-го авґуста 2017-го року Дітячій културно-освітній табор про русиньскы діти, котрого орґанізатором є Світовый конґрес Русинів (СКР). Діти із окремых членьскых держав СКР будуть на таборі до 25-го авґуста.

Є то першый річник меджінародного табора, котрый хоче найвысша меджінародна русиньска орґанізація робити шторік. На тогорічнім премєровім річнику мали можливость взяти участь по штири діти із Україны, Мадярьска, Польщі, Хорватії, Сербії і Румунії плус діти з домашньой Словакії. Наконець пришло в неділю на Сниньскы рыбникы 25 дітей із своїм педаґоґічным супроводом.

Як за Світовый конґрес Русинів інформовав Владимір Противняк, дітячій табор конґрес робить зо заміром спознавная културы і розвиваня языковых знань молодой ґенерації, утримованя материньского языка і културных цінностей Русинів в державах, де населіня того етніка жыє. Табор є про діти од 9 до 13 років, котры суть із русиньского оточіня, бісідують по русиньскы і мають інтерес проглубити свої знаня в русиньскім языку.

Про дітей є почас шестьох днів приготовленый богатый проґрам. Окрім клас, в котрых ся будуть учіти наприклад язык, о гімні, ербі, флаґу Русинів, будуть мати і творчі ділні в різных умелецькых техніках, приготовлене є і навчаня танця і співанок, чекать їх так само бесіда з русньскым писатлеьом, а спознають і околіцю Снины.

Літній табор з меджінароднов участьов быв підпореный Урядом влады Словацькой републікы в рамках проґраму Култура народностных меншын 2017.

Фотоґрафія: Юрій Шипович.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА