На пікніку народностей в Печі вказали ся і Русины

20-го авґуста 2017-го року проходив в мадярькім місті Печ вже Другый пікнік народностей, на котрім брали участь штири народностны меншыны – булгарьска, хорватьска, ромска і русиньска.

20-ый авґуст є в Мадярьску День святого Штефана, першого угорьского краля, котрый ся Мадярями барз чествує. Так само ся тот день святкує як День выникнутя мадярьской державности. В місті Печ, котре ся находить на югу Мадярьска, в Бараняньскій жупі, торжественно пережыли тот день за участи депутата мадярьского парламенту Пете Чізія. В місті зорґанізовали подію під назвов День родины. В рамках той події проходив і Другый пікнік народностных меншын, котрый быв підтриманый і Російскым центром Печской універзіты.

Печскы Булгарі, Хорваты, Ромове і Русины вказали перед тритісячовов публіков, котра брала участь на тій події, свої народны співанкы, танці, но так само варили і дали покоштовати зо своїх народных страв. За русиньску народностну меншыну в Печі выступав педаґоґ, родак із Підкарпатя, котрый вже дакілько десяток років жыє в Мадярьску – Йожеф Чегілі. В рамках културного проґраму выступав на сцені вєдно із своїма школярями, з котрыма на ґітарах одпрезентовав русиньскый репертоар. З ґастрономії была так само про участных наінтересніша русиньска кухня. На стравы, котры наварив Йожеф Чегілі, стояли найдовшы шоры. На події брали участь так само популарны мадярьскы співаци і подія святочно закінчіла ся огньостройом.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА