Річніцю кінця світовой войны припомянули собі панахідов

В суботу 11-го новембра 2017-го року, в день 99-ой річніці закінчіня Першой світовой войны, в кріпті під православнов церьквов в Осаднім одслужыли панахіду за павшых вояків. Панахіду одслужыв містный парох Петро Сорока.

Одсудити войну

„Почас вшыткых богосліжінь собі споминаме на павшых вояків, котры суть похоронены в нашій кріпті, і на вшыткых героїв воєн. Но на річніцю, яков є тота днешня, приходиме до кріпты, жебы ся помолити прямо на тім пієтнім місці і при погляді на кости одсудити войну,“ повів по суботній панахіді Сорока про словацькый денник Korzár.

Як раз теріторія днешньой северовыходной Словакії была постигнута найтяжшыма боями почас Першой світовой войны. На теріторії населеній історічно головно русиньскым жытельством находить ся і найвеце воєньскых цінтерів із той епохы. Унікатным цінтерьом є кріпта під православнов церьквов в Осаднім, де є в єднім гробі похороненых 1025 вояків. Далшых 1400 лежыть в двох шахтах на містнім цінтерю. Похореонены вояци вмерли почас Брусіловского перевалу в роках 1914 і 1915, кідь в навколишніх лісах проходили тяжкы бої. Втогды были вояци похоронены прямо в лісах або в навколишніх селах на цінтерях.

Осадняньска кріпта

„В роках 1933 аж 1934 были кости вояків перенесены до новозбудованой церькви в Осаднім. Їй будованя втогдышні уряды позволили з тым, же буде служыти як памятник російскых вояків. Кідьже ся ту вшыткы ексгумованы кости не вмістили, решта была похоронена в шахтах на міснтім цінтерю,“ повів далше про денник Петро Сорока.

Кріпта была зреконштруована в році 2005 і днесь є єдным із інтересных турістічных пунктів в тій области, котрый шторік прийде посмотрити много людей. Памятник над шахтами на містнім цінтерю выбудовали в році 2012.

Жрідло фотоґрафії: Петро Сорока.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА