ПроРусин / Укач Возняк не лем про вчыня лемківского языка на чужыні – середа, 20.00 год.

В днешнім проґрамі з сериі ПроРусин стрітиме ся з учытельом лемківского языка в Ліґници, Укачом Возняком. Наше інтервю зняте было і з нагоды недавного ювілею 80-літя мого спілбесідника, і зато, жебы записати уж не таку малу історию вчыня рідного языка Лемків на чужыні. 

Укач Возняк, уродженец Білцаревы і сын несполненого поеты Владиміра Возняка, на початку днешньой бесіды прочытат верш свого няня, верш, што засвідчат про патріотизм і велику тугу за втраченом вітчызном. В дальшій части проґраму послухаме про пляны Укача Возняка печатати книжку «Лемківскє весіля в Білцареві» авторства його няня. 

Тема учытелюваня в Ліґници займе нам найбільше часу. У. Возняк спомяне на 1991 рік, коли то зачал, на початку неформальні, вести вчыня рідного языка на чужыні. Побесідуєме і о основных проблемах тыкаючых вчыня языка серед лемківской меншыны та о кадровых браках – о браку учытелів русиньского языка в Польщы.

Фот. Фраґмент оповіданя «Короткій опис историі нашого села Білцаревы» з єдного з зошытів Владиміра Возняка. Допис датуваний на 60. рокы ХХ ст.

Премєра проґраму в середу, 13. грудня/децембра о 20.00 год., повторіня вночы з середы на четвер о 4.00 год. та в суботу, 16. грудня/децембра, о 15.00 год.