Rusyn Cup здобыли Хмелівчане

17-го марца 2018-го року в містьскій шпортовій салі Mier в Бардейові одбыв ся 5-ый річник футсалового турнаю Rusyn Cup. Участь на нім брали команды, котры поступили із кваліфікачных турнаїв у Братіславі, Гуменнім і Сабінові. Цілково до 5-го річника залучіло ся 30 команд із Братіславы, выходной Словакії і сербской Войводины.

O путовный погар Rusyn Cup в Бардейові змагали ся команды Свідник і Pusinky од Свідника, Dream Team Vihorlat од Собранець, East Side Gangsters SV од Снины, Amater Club oд Пряшова, Тіловыховна єднота (ТЄ) Дуява Хмельова од Бардейова і Заповці од Стропкова.

Турнай зачав змаганями в ґрупах, слідовало четвертьфінале, семіфінале і фінале. У фінале стрітили ся ТЄ Дуява Хмельова од Бардейова і родинна команда Заповці од Стропкова. Публіці понукли напинаве і якостне змаганя. Із тітулу тішять ся Хмелівчане, котры по продовжіню перемогли Заповців 1:0.

Напинавым было і свідницьке дербі о третє місце меджі командами Свідник і Pusinky. О перемозі Свідника 3:2 вырішыли аж стріляня на бранку. Найліпшым каноніром турная став Матєй Варян і найліпшым бранкарьом Патрік Малиняк, обидвоми із ТЄ Дуява Хмельова.

Турнай одбыв ся із підпоров міста Бардейов і міста Гуменне. Так само го підпорили радіо русин ФМ, Обчаньске здружіня молоды.Русины, Обчаньске здружіня Біловежан, IT Business і Tenty.sk.

Rusyn Cup є футсаловый турнай Русинів і їх приятелів. Выникнув у 2013-ім році в Братіславі, де на нім брало участь шість команд. Із причіны великого інтересу ся турнай скоро розростать і тішыть ся высокіій фотбаловій уровни. Мотіваційов є велика путовна трофей, на котрій суть мена грачів команд, котры перемогли.

Автор: Мартін Ямрошковіч

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА