Русиньскы діти змагали ся в знанях сербского языка. В суботу перевірять свій материньскый язык

Як інформовала аґентура Рутенпрес, в суботу 21-го апріля 2018-го року на Основній школі „Петро Кузмяк“ з русиньскым навчалным языком в Руськім Керестурі, в Сербії, проходило юбілейне 20-те Цілорепублікове змаганя зо сербского языка як нематериньского.

Цілорепблікове змаганя в суботу одкрыла директора містной школы Гелена Пашо Павловіч, котра привітала госітв із цілково 35-ох школ Войводины. У Войводині діють і школы далшых народностных меншын, котры в тій области жыють і ведуть освіту у своїм материньскім языку.

Меджі 86-ма школярями были успішны і школярі русиньскых школ, як той домашньой, так і школы в Коцурі. Найвекшы успіхы русиньскых школярів в міцній конкуренції здобыли Леонтій Сивч із Руського Крестура, Татяна Буіла і Даніела Горняк зо школы в Коцурі. Вшыткы здобыли другы місця у своїй катеґорії. На третіх місцях в єднакій катеґорії скінчіли Леон Юріч і Алексей Мудрі з керестурьской школы і Даріна Михняк з Коцура.

Меджі школярями семой класы на третім місці скінчіла Віолета Чіжмарь, так само з домашньой школы, котра гостила змаганя.

По замаганях зо знань сербского языка русиньскы школярі перевірять вже тоту суботу, 28-го апріля і свої знаня з материньского языка в рамках Меджіокружного змагання в русиньскім языку і в языковій културі. Тото змаганя буде проходити в Дюрдьові. Свої знаня вкажуть школярі од 5-ой по 8-му класу, котры вже перед тым успішно абсоловали школьскы змаганя, якы мали быти на основі рішіня Міністерства освіты, наукы і технолоґічного розвитку Сербії реалізованы до кінця марца.

Змаганя з русиньского языка і з языковой културы буде мати так само своє цілорепублікове коло. Тото перевіріня знань русиньскых школярів одбуде ся так само в Дюрдьові і є наплановане на 26-го мая.

Жрідло фотоґрафії: Рутенпрес.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА