Родаци із затопленых сел святковали одпуст

Як інформовав Пресовый центер Кошыцькой єпархії, 6-го мая 2018-го року, в Неділю сліпого од народжіня за новым календарьом, на теріторії бывшого села Велика Поляна коло водного резервоару Старина одслужыв владыка Мілан (Хаутур), кошыцькый ґрекокатолицькый єпарха, торжественну aрхієрейску літурґію із нагоды одпустового свята колишньой церькви і стрічі родаків зо затопленых сел.

На святочній події брало участь дакілько священиків з цілой околіці. Літурґія была єдночасно і першов Божественнов літурґійов новоєрея Юрая Мощака, котрого родічі, єднако як і владыка Мілан, походять із Великой Поляны. Кошыцькый єпарха приговорив ся участным проповідьов по русиньскы. Родаци зо затопленых сел тот рік на традічній стірчі не мали лем мірованя і аґапе, но і благословліня од новосвященика.

Велика Поляна была село в окресі Снина, котре выселили в 1980-ім році з причіны будованя водного резервоару Старина. Жертвами будованя были і далшы русиньскы села – Дара, Остружніця, Руське, Смолник, Старина і Звала. Першый писемный документ о заникнутім селі походить із 1493-го року.

Із цілого села сохранив ся лем цінтерь, єдна хыжа і памятник павшым воякам 1. світовой войны на воєньскім цінтері. Всокотили ся і розвалины церькви із 1784-го року. Під селом коло Лукового потічка стоїть крест із 1853-го року. Воєньскый цінтерь вояків із 1-ой світовой войны, котрый находить ся на Заднім Годошіку, є найвысше положеным воєньскым цінтерьом на Словакії (825 м н. м.). В селі ся народив і вызначный русиньскый малярь Орест Дубай.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА