Папа римскый Франціск прияв метрополіту Ростислава

Голова Католицькой церькви прияла в пятніцю 11-го мая 2018-го року на особистій авдіенції метрополіту Ростислава, першоєрарху Православной церькви в чеськых країнах і на Словакії.

Метрополіту Ростислава при стрічі з папом Франціском допроводив пердседа Папской рады на підпору єдности хрістіанів кардінал Курт Кох. В делеґації были михалівсько-кошыцькый архієпіскоп Ґеорґій, архієпіскоп празьскый і чеськых країн Михаіл і далшы представителі Православной церькви. Історічно перша стріча метрополіты Ростислава із папом Франціском надвязує на його стрічу з кардіналом Куртом Кохом почас навщівы председы Папской рады на підпору єдности хрістіанів у Братіславі і Пряшові в октобрі 2017-го року.

Архієпіскоп Ростислав у своїм приговорі повів, же і кідь того часу православны і римскы католици не годны із історічных причін „вєдно ламати Хліб Жывота“, зіставають учениками, котры „вєдно як путници крачають по дразі і з котрыма, і кідь собі то може даколи не усвідомлюєме, довєдна крачать і наш Господь і Бог, котрый нас потішать, роскрывать нам Писма, давать нову надію, наповнює одвагов і обновлює нашу довіру.“

Метрополіта так само папови повів: „Днесь ня, Ваша Святость, як єдного із наступників святого Методія на престолі моравско-паноньскых архієпіскопів принимате з єднаков радостьов і любвов, з яков св. Методія прияв у 868-ім році Ваш честованый попередник Гадріан.“ Папа римскый Франціск на приговор архієпіскопа реаґовав словами, же єдность не значіть єднакость, а гармонізацію різніня у Святім Дусі. Выразив надію, же на молитвы святых Кіріла і Методія одбидві церькви єдного дня прийдуть до цілковой єдности, до котрой поступно прямують.

Обидвоми церьковны представителі оцінили діялность Змішаной меджінародной комісії про теолоґічный діалоґ меджі Католицьков церьквов і Православнов церьквов. У тій комісії заступать Православну церьков в чеськых країнах і на Словакії михалівско-кошыцькый архієпіскоп Ґеорґій. Папа повів, же собі желать, жебы тота комісія, котра у 2016-ім році выдала документ о односинах меджі папскым пріматом і соборностьов в першім тісячлітю, продовжовала в проглубльованю діалоґу на тоту тему.

В рамках штиридньового проґраму в Римі служыв метрополіта Ростислав Божественну літурґію коло гробу св. Кіріла в римскій Базиліці св. Клімента. Вєдно із свойов делеґаційов навщівив і Базиліку св. Петра, Базиліку св. Павла ці Катакомбы св. Себастіана.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА