Біциґльова траса через Лемковину і Пряшівску Русь

Вызначено 200 км роверовых пути по обох странах границі. На трасах поміщено інформацийны таблиці, побудувано задашены конструкциі, де мож пристанути і одпочати, а стежкы розплянувано так, жебы заіхати в природничо-культуровы цінны місця. Трасы ведут м.ін. через Гавай, Габуру, Чертіжне, Вислок, Пулавы, Балутянку ци Дошно.

Мож уж хоснувати 200 км роверовых пути в Низкым Бескіді на польско-словацкым пограничы, котры зрыхтували лісничы з Рыманова і Вранова. Сфінансувана в 72. процентах з середків Евросоюзу інвестиция коштувала більше як 138 тис. евро. В рамках трансграничного проєкту «Промоция природничой і культуровой спадковины польско-словацкого погранича через біциґльовы трасы» повело ся ознакувати сіт роверовых трас о ріжній ступени. В більшости ведут через істніючы лісовы стежкы, туристичны пути, лісовы ци публичны дорогы. Приспособлено іх для потреб біциклистів.

В рамках проєкту ознакувано близко 150 км стежок по польскій страні і 50 км по словацкій. Вздолж трас побудувано 7 задашеных конструкций, під котрыма мож ся затримати на одпочынок. На обшыри Надлісництва Рыманів поставлено 4 такы обєкты в міцях, котры од років звязаны сут з туристиком, то є в Полянях Суровичных, при паркінґу грибярів в Лісництві Шахты, Черемсі та на трасі червеного бескідского пути в Дарові.

Результатом цілого проєкту є сіт стежок, котра дає нагоду на заплянуваня розмаітых вариянтів роверовых прогульок – легшы для цілых родин ци тяжкы, з острыма підіздами, для барже вправленых біциклистів. При стежках поставлено інформацийны таблиці, з котрых мож ся дознати про природничы особливости терену та про історию погранича.

Головна стежка веде з Пулав до Дрічной, прилігат то ней шор побічных трас в формі колеса, з котрых кажда має своі особливости. Мож переіхати близко двох резерватів: Камін над Яслисками і Буковиця, а через третій мож переіхати середином. На Пряшівскій Руси мож зробити трасу ведучу через Чертіжне, а там видіти м.ін. гріб Адольфа Добряньского (тото місце описане є в брошурі реклямуючій трасы), Габуру, Меджелябірці і Малу Поляну та Микову до Дрічной, або пошырити єй о Гавай і Сташківці. Розмаіты трасы мож схоснувати по другій страні.

22. мая т.р прошло торжественне закінчыня проєкту «Промоция природничой і культуровой спадковины…», в котрым участ взяли м.ін. Марек Марецкі, заступця Директора дс. Лісовой Господаркы, ци Мариян Станік, Ґенеральний Директор Лісів Словацкой Республикы. Парудесятособова ґрупа роверистів заініциювала прогулькы по новых трасах.

Фот. rymanow.krosno.lasy.gov.pl