Rusyn Cup выграли Міклушевці

В суботу 2-го марца 2019-го року в містьскій шпортовій салі Mier в Бардейові проходило фіналове змаганя VI. річника фотбалового турнаю Rusyn Cup о путовный Русиньскый Погар.

Цінна русиньска шпортова трофей по році в руках ТЄ Дуява Хмельова одходить за новыма переможцями до Хорватії.

16 команд із трьох держав

На фіналовых змаганях брало участь 16 команд із трьох держав. Цілково ся тот рік до кваліфікачных змагань, котры проходили в Братіславі, Старій Любовні, Свіднику, Михалівцях і Руськім Керестурі, залучіло 35 команд.

На фінале в Бардейові тот рік грали команды Ferino Team (Снина/Братіслава), Свідник (Свідник/Братіслава), Кооперація ФУ (Стара Любовня/Братіслава), Аmater Club (Снина/Пряшів), Шамбріньці (Шамброн), Lifedecor (Стара Любовня), I-Star (вояци Пряшів), Заповці (родина Запотоцькых із Стропкова), Pusinky (Свідник), Цернина (Свідник), Dream Team (Меджілабірці), Peaky Blinders (Собранці/Убля), НК Русин Міклушевці (Міклушевці, Хорватія), Керестурски Бетятре (Руськый Керестур, Сербія) і Браца Русини (Руськый Керестур, Сербія) і минулочіный шампіон ТЄ Дуява Хмельова (Хмельова).

Погар здобыли Міклушевці

Турнай зачав змаганями в ґрупах, слідовало четвертьфінале, семіфінале і фінале. З ґруп до далшых змагань поступили команды ТЄ Дуява Хмельова, котра ся дале стрітила з командов Lifedecor, НК Русин Міклушевці, котра грала в тій фазі турнаю із I-Star, команда Dream Team, яка дістала до далшого змаганя Pusinky, і команда Свідник, котра грала із Ferino Team.

Резултаты їх взаємных змагань вырішыли о тім, же меджі штири найліпшы команды ся дістали ТЄ Дуява Хмельова, НК Русин Міклушевці, Pusinky і Свідник. Минулорічны шампіоны ТЄ Дуява Хмельова програли в змаганю із НК Русин Міклушевці 1:2 по продовжіню і далше продовжовали в турнаї уж лем змаганьом о третє місце. Щастя в змаганю Pusinky – Свідник было на боці Свідника, котрый выграв 0:1.

В змганю о третє місце наступли проти собі ТЄ Дуява Хмельова і Pusinky, і по єднозначнім резултаті 6:0 ся меджі першы три команды дісталі минулорішны переможці Хмелівчане. Фіналове змаганя о перше місце належало командам НК Русин Міклушевці і Свідник. Міклушевці так само декласовали Свідничанів 5:1, чім собі Русины із Хорватії забезпечіли цілкову перемогу на VI. річнику Rusyn Cup, і путовный Русиньскый погар так взяли зо собов.

Оціньовали і грачів

Окрім команд были на турнаї оцінены і окремы грачі в катеґоріях найліпшый стрілець, найліпшый бранкарь (воротарь) і найліпшый грач турнаю.

Тітул найліпшого стрілця собі одніс грач команды Свідник Михал Южанін. Йосип Штырбо із НК Русн Міклушевці быв выголошеный за найліпшого бранкаря і цілково найліпшым грачом тогорічного турнаю став Матєй Варян із ТЄ Дуява Хмельова.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА