Карпаторусиньскє Общество в ЗША рыхтує свій ювілей

Карпаторусиньскє Общество в Зъєднаных Штатах Америкы того рока празднує ювілей, 25-літя діяльности. В остатніх днях на сайті той еміґрантской орґанізациі вказал ся детальный проґрам упамятнінь, якы заплянуваны сут на вікенд 17.-19. мая 2019 р.

Празднуваня зачне ся в пятницю (17. мая) о 18.30 год. в Нацийональным Карпаторусиньскым Культурным і Едукацийным Центрі, діючым при обществі, якій містит ся в Мунгаль в Пенсильваніі. На початок пройде музична част проґраму. Выступувати будут фольклорный ансамбль Славяне, пак ґрупа Гармонія Банд. В тот сам ден клівлендскє одділіня орґанізує од рана інчу ініциятиву. О год. 09.30 рано одбуде ся прогулька по місті Клівленд (штат Огайо) русиньскыма слідами. Детальна мапа прогулькы буде доступна заінтересуваным перед єй початком.

В проґрамі конечно нашли ся і дальшы упамятніня, якы проходити мают в інчых місцевостях Америкы. Так 18. мая буде нагода поіхати русиньскым бусом по Пітсбурґу з першым предсідательом Карпаторусиньского Общества, Джоном Ріґетті, якій поведе охочых по дальшых заплянуваных на тот ден акциях. В запрошыню на тоту акцию орґанізаторы пишут, што місто Пітсбурґ одограло значну роль в розвитку русиньской соспільности, так в локальным, як і медженародным вымірі. В Мунгаль в суботу о 11.00 год. пройде выклад присвяченый деревяным карпатскым церквам і іх архітектурі. Др М. Парвеньскій запрезентує ріжны архітектонічны типы русиньскых храмів. На тоту акцию вступне дармо.

Дальше, о 13.00 год. в тым самым місци одбуде ся стріча пн. Єм Карпатскым Русином і жыл єм в пятьох ріжных державах, а николи єм ся не переселял. Буде то прелекция про положыня Карпатской Руси, а точнійше Підкарпатя, де обставины были такы, што люде родили ся за Австро-Угрів, до школы ходили в Чехословациі, вічнали ся за Мадярів, робили за Совітского Союзу, а померли на Украіні. В доповіди увага буде звернена на постепенны зміны границ ріжных держав, што мало влияня і на жытя Русинів. На суботній вечер заплянувано іщы і офіцияльный банкєт членів і любителів орґанізациі. В остатній ден упамятнінь, в неділю (19. мая) рано пройде в Мунгаль шторічна стріча членів, на котрій представляне буде підсумуваня і пляны на будуче. Детальный проґрам доступный є на сайті Общества. Декотры з подій сут платны.

Карпаторусиньскє Общество возникло як орґанізация нон-профіт в 1994 р. в Пітсбурґу в кругу еміґрантів з цілой Карпатской Руси і іх потомных. Головном задачом і діяльністю є популяризация в ЗША русиньской культуры і підтримуваня контактів зо Старым Крайом. До общества приналежыт коло 1250 членів не лем з Америкы, але і дальшых части світа. Єдном з основательок была Мариян Сивак, яка актуально є ведучом орґанізациі. Першым предсідательом был Джон Ріґетті, а по ним Джім Кепчар-Каміньскій. Карпаторусиньскє Общество выдає свій пресовый орґан – The New Rusyn Times. Oд 2004 р. при орґанізациі діє Нацийональный Карпаторусиньскій Культурный і Едукацийный Центр, якій зорґанізуваный єст в Мунгаль, в грекокатолицкій кафедрі св. Йоана.