В Санковій провірят ґеотермію

Вчера, 10. квітня/апріля 2019 р., в Санковій при участи Міністра Середовиска Генрика Ковальчыка війт ґміны Санкова Малґожата Малух підписала з Презесом Заряду Нацийонального Фонду Охороны Середовиска і Водных Ресурсів Мареком Рышком умову о дофінансуваня прібного верчыня в земли. Цілю є провірити, ци на обшыри ґорлицкого реґіону находят ся великы ґеотермальны воды, з якых місто і села могли бы мати хосен.

Про позитивне оцініня внеску на прібне верчыня в Санковій писали сме влони. Товды же реґіональны власти отримали одповід, што внесок возмут до увагы столичны власти. Тепер довершено формальности.

На торжественным підписаню умовы пристуный был і Рафал Кукля, бургомайстер Ґорлиц – міста, якє є партнером проєкту. Вєдно з ґміном Санкова сут они бенефіциєнтами дотациі, яка має гейбы причынити ся до одкрытя хосенных джерел ґеотерміі. Кєд досліджыня выкажут, што параметры, такы як температура воды, сут старчаючы, буде нагода хоснувати єй в обшыри енерґетикы. Параметры, якы конечно повинна мати санківска вода, то температура не меньша як 60°C та выдайніст на рівни 70 м³/год. В рамках затвердженого проєкту вертіти будут на глубину 3000 метрів. Сумаричный кошт рахуваный є на більше як 17,5 мілийона золотых. Проєкт реалізуваный має быти до 2020 р. Прібне верчыня пройде в Санковій, в місци вказаным скорше через Науково-Технічный Університет в Кракові. Знатя, што буде то місце в околицях футбольового пляцу.

О термальных водах в Санковій першый раз было чути 7 років тому, коли компанія з Кракова задумала вертіти в місцях по експлоатациі ропы. Товды думка втихла і на пару років была одсунена на другій плян. Коли досліджыня явили бы ся успішныма, в плянях є побудувати на обшыри ґміны Санкова ґеотермальну теплоцентралю. Одтамале продукувана теплота достарчана мала бы быти на обшыр Ґорлиц, через што огріти бы были містны осіля, а при тым сохранене середовиско та зменчены оплаты за енерґетику. З другого боку, проєктодавці плянуют хоснувати ґеотермію і до рекреацийных активности. В плянах є побудувати комплекс ґеотермальных басенів, што влинуло бы на збільшыня атракцийности реґіону і дальшый розвиток туристичного руху. Бенефіциєнты на тот момент глядают інвестора, якій зміг бы доінвестувати в місцеву ґеотермію.

Хоснуючы присутніст при підписаню умовы Міністра Середовиска Генрика Ковалькыка, самоурядовы власти реґіону мали нагоду представити своі погляды на вшелеякы проблемы і будучы пляны. Єдным зо забераючых голос был бургомайстер Ґорлиц, Р. Кукля, якій направил ся до Міністра з просьбом помочы розвязати проблем іліґального складовиска смітя на обшыри бывшой рафінериі в місті. Міністер підчеркнул, што його ресорт робит над одповідніма реґуляциями, якы мают успішно бороти ся зо смітныма мафіями.

фот. Уряд Міста Ґорлиці / Марцін Ґуґульскій