Сумар дня на 26. серпня/авґуста 2019 р.

Приносиме Вам сумар медияльной ґрупы ЛЕМ.фм на ден 26. серпня/авґуста 2019 р.

8. едиция Фесівалю Церковных Хорів в Креници

В минулу суботу, 24. серпня/авґуста, в креницкій Православній Церкви св. Владиміра Великого проходил Фестіваль Церковных Хорів. 8. едицию той подіі вюл місцевый парох, о. Петро Пупчык. Концерт одкрыл выступ локального парохіяльного хору, котрым дириґує Петро Трохановскій. Пак заспівал квартет Ікос веденый Лукашом Гайдученьом, в склад котрого входят дві Лемкыні. Запрезентували розмаіты пісні, серед котрых не бракло композиций знаных на Лемковині. Хор св. Юрия, якій основаный был 75 років тому, приіхал з Бельграду з Сербіі. Брал участ в многых фестівалях, де был доціняный за свою працу. Представил він композициі сербскых творців. Публика, в склад якой входили головно туристы, мала можливіст запознати ся з богатством, якє крыє в собі церковна музика. Остатній хор творила молодіж креницкой парохіі. Дириґувал ним Андрий Трохановскій, а серед репертуару хору нашла ся і коляда.

Варштаты карпатского хрестикового гафту в Команчы

Православна парохiя Покровы Пресвятой Богородиці в Команчы та мiсцевый ансамбль ЛемМы, в репертуарі якого находят ся лемківскы співанкы, просят дiти, молодiж i дорослых на варштаты карпатского хрестикового гафту. Варштаты пройдут в ремізі протиогньовой стражы в Команчы в штырьох вызначеных термiнах. Першы одбудут ся уж заран, 27. серпня/авґуста, о 16.00 год. Другы пройдут 9. вересня/септембра, а дальшы 16. i 25. вересня/септембра. Варштаты орґанiзуваны сут в рамках проєкту пн. «Карпатскы вышыванкы». Сут они дармовы, а орґанiзатор дає вшыткы потрiбны материялы на занятя. Чысло мiсц є ограничене, рішат порядок зголошынь. Записы тырвают до 27. серпня/авґуста. Проєкт фiнансуваный є з проґраму Фонд Громадяньскых Iнiциятив і підпорює го ґмiнный Осередок Культуры в Команчы.

Четвертый річник «Черезграничной стрічы Сулин-Жеґєстів»

В першый ден вересня/септембра пройде слідуюча подія «Черезгранична стріча Сулин-Жеґєстів», котра має за ціль покріпляти меджедержавну спілпрацу тых двох сел – жытелями єдного з них доднес сут Русины. Тогорічна стріча одбуде ся уж четвертый раз. Подія зачне ся од привитаня жытелів обох сел на лавці о 14.00 год. через старостку Сулина. Як каждый рік, перед культурным проґрамом буде і спільне богослужыня до Божого Милосердя. Молитву очелят грекокатолицкій парох з Сулина та римокатолицкій священник з Жеґєстова. Пак по сулиньскій страні одбуде ся культурный проґрам при участи польскых, словацкых і русиньскых колективів з той части реґіону. Выступлят фольклорны ансамблі з Жеґєстова і Мушыны, русиньскій колектив Барвінок з Камюнкы, солистка Наталия Кучова з Литмановой, домашня сулиньска мужска ґрупа солистів, діти і інчы. Єдным з імпульсів на шторічну офіцияльну стрічу жытелів Сулина і Жеґєстова єст побудувана в роках 2014-2015 тзв. лавка спілпрацы і розвитку погранича.