В суботу ювілей пшемківской парохіі

В найблизшу суботу, 7. вересня/септембра, православна парохія св. Михала Архангеля офіцияльно одзначыт ювілей 70-літя істнуваня. З той нагоды парох і вірны пшемківской церкви просят до спільной молитвы і споминів з нагоды той єдной з найстаршых православных парохій на західніх землях Польщы.

Парохію од самого початку творили в переважаючій більшости переселены Русины з Лемковины. Пшемків і околиці то доднес єдно з найвекшых зґрупувань лемківской меншыны в Польщы.

Літургію очелит владыка

В святочный ден для пшемківскых вірных, о 9.30 год. зачне ся архієрейска Божеска Літургія. Кус перше, на порозі святыні архієпископа Юрия, владыку вроцлавско-щеціньской єпархіі ПАПЦ, будуту витати парохіяне і настоятель храму, о. митр. Ігор Попович. По літургіі одслуженый буде молебен, а пак посвячыня пропамятного креста на памятку ериґуваня парохіі в 1949 р.

Попри ювілею парохіі, свій ювілей мат так само настоятель о. Попович, котрый од сорока років служыт вірным в Пшемкові. Пришол на парохію в 1979 р. як шестый парох од основаня парохіі.

Парохія Лемків

Першы православны вірны нашли ся в Пшемкові і околицях в наслідстві акциі Вісла. Были то в більшости переселены Русины з Лемковины. Трафили на околичны села в червци/юнію і липци/юлию 1947 р. Бывшый парох Фльоринкы, о. Штефан Бігун, будучы єдным з орґанізаторів церковного жытя на чужыні, внет звернул ся до Воєвідского Уряду во Вроцлаві о згоду на ериґуваня парохіі. Одповід была – ніт.

Священник Бігун і парохіяне надале старали ся о згоду на покликаня парохіі. Против дало і Міністерство Одзысканых Земель. Конец-кінцьом, 14. червця/юнія 1949 р. в Пшемкові одслужена была першым настоятельом той парохіі, о. Віктором Масіком, Божеска Літургія. Хоц богослужыня были служены, то офіцияльно парохія не фунґувала. Аж 27. лютого/фебруара 1951 р. Міністерство Публичной Адміністрациі дозволило ериґувати парохію. Внет, бо 14. четрвця/юнія 1951 р., для вірных православной Церкви передано бывшый евангелицкій храм з 1774 р., котрый доднес выполнят фукцию православной парохіяльной святыні.

Дальшыма парохами были о. Ігнатий Романюк, о. Миколай Лещыньскій, о. Миколай Полещук, о. Богдан Сенцьо і о. Ігор Попович. Початково громаду творило близко 30 родин. Днешня парохія за інформациями з 2013 р. чыслит 310 осіб, будучы єдном з більшых в тій части Польщы. В 1963-1965 рр. поевангелицкій храм был модернізуваный. Товды тіж внутрі нашло ся місце на іконостас, якій был зробленый самыма парохіянами. Церков має розпис на повалі і стінах. Робил го проф. Академіі Красных Штук в Кракові, Адам Стальони-Добжаньскій.