Сумар дня на 12. вересня/септембра 2019 р.

Приносиме Вам сумар медияльной ґрупы ЛЕМ.фм на ден 12. вересня/септембра 2019 р.

За нами першый етап ремонту цмонтеря в Лабовій. Потрібны фонды на дальшу модернізацию

Завершыл ся перый етап ремонту лемківского цмонтеря в Лабовій. Проходил він од 1. – 6. вересня/септембра т.р. Початкого орґанізаторы плянували в тых днях выремонтувати меньше веце 4 – 5 камінных крестів і памятників. Як інформували думкодавці конец-кінцьом повело ся ім зробити більше нич перше закладали. На фейсбуковым фанпейджы під назвом Ремонт цмонтеря в Лабовій можете видіти знимкы з першой части модернізациі того великого цмонтеря, якій чыслит бл. 1 гектар. Фурт мож спомочы дальшы етапы ремонту. На тот момент зобрано невельо понад 2 тис. зл, што дає барз низку суму. Орґанізаторы передвидуют, же цілковитый ремонт цмонтеря може коштувати в аж 25. тис. зл. Фінансову підпору мож передавати через збірку на зайті www.zrzutka.pl. Орґанізаторы сут Лемківскій Ансамбль Пісні і Танця Кычера, Стоваришыня Маґурич, при спертю Стоваришыня Лемків і Музею Лемківской Культуры в Зындрановій.

В неділю Фестіваль «Наша Спільна Незалежна»

В найблизшу неділю, 15. вересня/септембра, на бульварі ім. Леха і Мариі Качыньскых во Вроцалві одбуде ся Фестіваль «Наша Спільна Незалежна». Буде то культурна подія, яка має за ціль вказати, што Польща в річницю ста років од выборотя незалежности єст дежравом одкрытом для вшыткых – в тым і для нацийональных і етнічных меншын. В проґрамі фестівалю концерты ріжных ґруп, специяльно зрыхтувана на тот ден театральна пєса, крамы консулятів і стоіска нацийональных і етнічных меншын. Серед запрошеных находят ся Лемкы, якы в тот ден так само будут выставлювати свій крам. Медияльна ґрупа ЛЕМ.фм+ являт ся єдным з партнерів подіі і буде представляля Лемків на тій подіі. Прото тіж перше лемківскє радийо буде активно брало участ в фестівали “Наша Спільна Незалежна”. Подія зачне ся в само полудне, а потырват до пізного вечера. На подію красні просят Нижньошлезскій воєвода Павел Греняк і Фундация Арттракция. Почесный патронат над подійом тримат Міністер Заграничных Справ Польской Резпубликы.

В Кракові буде побудувана нова православна церков

Краків, попри Вроцлаві, то єден з векшых осередків, до котрого подают ся студиювати молоды Лемкы з Лемковины, а пак часто лишают ся гын на долше за роботом. Так само до Кракова за высшом освітом радо выберают ся родакы з чужыны. Вчас послідньой Рады Міста, радникы Кракова схвалили, што місто передаст місцевій православній парохіі ґрунт під будову новой святыні. Тота мала бы быти побудувана протягом найблизшых років. Церков мала бы помістити до 600 вірных. Ділянка, котру передало місто, находит ся при ул. Вьослярскій. ПАПЦ отримат єй з 95-процентовом боніфікатом. З просьбом до власти Кракова передати ділянку выступил владыка Атанасий, єпископ лодзіньско-познаньскій. Єдным з арґументів за побудуваньом другой православной святыні в місті є велика фаля еміґрациі зо сходу, головно з Украіны, а тіж самособом інтенсивне збільшыня ся вірных. Тепер ґрупа парох архітектів думат над проєктом.

Новый сериял о Енді Варголи

Netflix, американьскій провайдер фільмів і сериялів «на заклик», через сіт інтернету рыхтує документальный серияль о Енді Варголи. За продукцию 10-одтинковой сериі про єдного з найбарже знаных артистів ХХ ст. одповідат Раян Мерфі. В бесіді з маґазином «Time» американьскій фільмовец выявил, што зачал роботу над документом о Енді. Десятодтинкова серия Netflixа має вказати короля поп-арту, подля Раяна Мерфі, як «правдивого чловека, котрого творчіст змінила наше жытя». Дата премєры сериялю іщы не є знана. То не єдиный новый проєкт Мерфі. Продуцент заповіл тіж 10-одтинкову серию про Роя Гальстона, американьского проєктанта моды, а разом з Джесіком Ленґ роблят над проєктом о Марлен Дітріх. Лем того рока єден з найбарже могучых люди в американьскым шов-бізнесі, Мерфі, зачал роботу над фільмовом адаптацийом мюзікалю «The Prom» з Мериль Стріп і Ніколь Кідман.

Тогорічный фестіваль ім. Зиґмунта Гаупта

Од 25.-29. вересня/септембра т.р. в Ґорлицях буде проходила 5. едиция літературного фестівалю ім. Зиґмунта Гаупта. Toгорічный проґрам фестівалю то аж 5 дни, 26 подій і 37 гости. Серед них одбудут ся стрічы з авторами презентуючыма ріжны жанры – од прозы, через поезию, по репортаж і біоґрафію. Проґрам даст можніст взяти участ в концерті і тематичных стрічах під назвом “Міста Зиґмунта Гаупта”. В проґрамі в неділю буде част присвячена 110. річници народжыня поеты лемківского походжыня Богдана Ігоря Антонича. Але то не конец атракций. Охочы брати участ в фестівали будут мочы обзерати і дальшы выставы, а так само слухати чытаня прозы патрона фестівалю. Гаупт был польскым писательом, якій народил ся на Подоли, а вмер в 1975 р. в ЗША. Детальный проґрам чытайте на сайті www.festiwalhaupta.pl.