Музей Варгола має дістати дізайн і функціоналіту 21-го столітя

Значну зміну характеру будовы Музею модерного уменя Енді Варгола в Меджілабірцях має принести велика реконштрукція, котра бы мала быти реалізована і вдяка фінанчній помочі од словацькой влады.

Днесь говорить ся о двох віаріантах реконштрукції, єден є туньшый, другый дорогшый. Котры бы мав быти реалізованый, буде дефінітівно вірішене владов в короткім часі. Так выразив ся премєр Петер Пеллеґріні на выїздовім засіданю влады, котре проходило в Ґіралтівцях 17-го септембра 2019-го року.

Дізайн і функціоналіта 21-го столія

Конштрукчну, респонзівну фасаду бы мав мати музей Варгола по своїй реконштрукції, што бы до музею мало внести дізайн і фунцкіоналіту 21-го столітя і так само розшыріня експозіцій на стріху. Про аґентуру TASR то потвердив Мартін Цубяк, директор Музею модерного уменя Енді Варгола.

„Ціла реконштрукцію є збудована на єдности меджі інтерьером і екстерьєром і значнім змодернізованю і зактуалізованю музею про 21-ше столітя з тым, же бы навщівник працовав з різнов уровньов шкушености при навщіві музею і не было то лем о позераню образів,“ повів Цубяк.

Тому має помочі респонзівна фасада, котру директор музею прирівнав ку парізькому Центру Помпіду.

Респонзівна фасада є конштрукція, до котрой, як пояснив про аґентуру Цубяк, можуть дати ся різны боксы, котры служать на воркшопы, або як простор, де ся будуть дати посмотрити мултімедіалны файлы ці відеа. Меджі старов і новов фасадов буде часть, кадыль ся буде дати ходити і люди будуть „як кебы частьов будовы,“ інформовав. Конштрукція єдночасно уможнить то, же стріха буде годна быти хоснована як оддыхова зона.

Конштукція будовы рахує наприклад з LED екранами ці ілуміначным освітліньом. Цільом є доповнити музей о мултімедіалны засягы і так го значно затрактівнити.

На умелецькый твор підуть міліоны

Цубяк говорить, же головным заміром реконштрукції музею, котрый быв одкрытый у 1991-ім році як першый на світі Варголів музей, є зробити з будовы умелецькый твор, котрый буде збудованый на мултімедіалности, яка была характерістічна про краля поп-арту.

Веджіня інштітуції очекує, же актрактівіта ся тым може підняти так, же навщівници музею, котры векшынов ходять зо заграніча, будуть хотіти зістати в Меджілабірцях довше, як реално зіставають теперь.

Проєктову документацію ку реконштрукції зробив музей на основі приобіцяня словацькой влады дати на ню грошы. Тото приобіцяня пришло од словацькой влады почас выїздового засіданя в Меджілабірцях, котре проходило в апрілю того року.

Моментално ся роздумує о двох варіантах обновы. Першый є дорогшый, в сумі 7,1 міліона евр. Другый, туньшый рахує з вытратами 5,4 міліона. Туньшый варіант не рахує з дакотрыма, головно мултімедіалныма, елементами, припадно пропонує туньшы алтернатівы. О тім, котров верзійов реконштрукції перейде музей, вырішыть влада, котра то буде фінанцовати.

Музей модерного уменя Енді Варгола є од 2002-го року іншітуційов, котрой зряджовательом є Пряшівскый самосправный край.

Жрідло фотоґрафії: Яна Отріова.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА