Александер Ґлазунов был росийскым композитором, представником романтизму. Вродил ся в 1865 році в Петерсбурґу, вмер в 1936 році в Парижы.
Был улюбленым учеником Римского-Корсакова, разом з котрым працували над докінчыньом творів скоро вмерлого Александра Бородіна, занимали ся м.ін. опером «Князь Ігор». Сам тіж занимал ся дидактиком, а його найбарже знаныма школярями были Сергій Прокофієв ци Димитрий Шостакович.
Успіхы зачали приходити уж в молодых роках Ґлазунова. В 1882 році (мал товды лем 17 років) його Симфонія зробила великє вражыня, але николи не выпрацувал сой свого стилю, так як прим. Рахманінов. Ґлазунов был під влияньом Ф. Ліста, Р. Ваґнера, як і композиторів росийской школы. Вельо компонувал аж до 1905 рока, коли менували го директором Консерваториі в Петерсбурґу. В 1928 році лишыл Росию. Дириґувал в Іспаниі, ЗША і Великій Британіі. Пізнйіше оселил ся в Парижы.
Скомпонувал девят симфоній, концерт на гушлі, два концерты на фортепіан, сім смыковых квартетів, два балеты, концерт на саксофон, симфонічны поемы і пісні.
Коментарі