Америцькый амбасадор: Знам Русинів

Як сьме вже повідомили скоріше, амбасадор Споєных штатів Америкы на Словакії дня 12-го юнія 2017-го року быв участный на цілословацькім конкурзі в декламації русиньской поезії, прозы, народного розсповіданя, малых сценічных форм і властной творчости Духновічів Пряшів 2017. Но Адам Стерлінґ не пришов лем міджі русиньскы діти. 12-го юнія на Словакії святкує ся День Русинів, і зато амбасадор присвятив цілу свою робочу драгу Русинам.

Іщі в Пряшові, почас конкурзу мав стрічу і з председом Русиньской оброды на Словеньску – Мартіном Карашом, кідьже, як сам повів, є амбасадором на Словакії, де не жыють лем Словаци, а і народностны меншыны і так хоче чути і о проблемах і траплінях, котры мають тоты меншыны в державі, в котрій моментално выконує діпломатічну службу. Амбасадор пак в робочій дразі присвяченій Русинам продовжовав, кідь навщівив Міджілабірці, Свідник, Бодружаль.

Знам Русинів

Як інформує свідницька ґазета Podduklianske novinky, во Свіднику прияв Стерлінґа Ян Голодняк, пріматор міста. І з ним бісідовав на тему Русинів. Докінця повів, же знать, хто суть Русины.

„Знам Русинів, знам о них дашто. І то нелем зато, же Споєны штаты суть знамы тым, же є там досправды вельо еміґрантів і многы походжають зо Словакії і велике проценто суть люди як раз з того реґіону. Значіть і Русины. Двоми з тых найзнамішых, ці вже прямо приселенців, або їх дітей, значіть той далшой ґенерації, мають русиньскы коріня. Суть нима Енді Варгол, котрого музей єм перед хвільов навщівив, або Михал Стренк, котрый быв мариняком і є частьов найіконічнішой фотоґрафії документуючой бої в ІІ. світовій войні,“ цітує ґазета америцького амбасадора.

„Жебы єм оддав честь тому дню (Дню Русинів Словакії, позн. ред.), днешній день зачали сьме в Пряшові… Потім сьме навщівили Міджілабірці, де сьме окрім іншого посмотрили собі і Музей Енді Варгола а підеме посмотрити і храм в Бодружалі. Тот день є до великой міры досправды Дньом Русинів, нелем про самых Русинів, але і про мене,“ продовжовав амбасадор.

Адам Стерлінґ по навщіві Свідника одышов до Бодружалі, русиньского села, в котрім находить ся єдна із найстаршых деревяных церьквей на Словакії. Є то Церьков святого Николая збудована в році 1658. В році 2008 была записана до Списку світовой дідовизны UNESCO.

Адам Стерлінґ

Амбасадор Адам Стерлінґ пришов на Словакію в році 2016. Як старшый карьєрный діпломат быв роках 2013 – 2016 заступньком ведучого місії і двоїтый Chargé d´Affaires в Голандії. В роках 2010 – 2013 служыв як заступньк ведучого місії і двоїтый Chargé d´Affaires в Казахстані. Говорить по французькы, іспаньскы, росісйкы, азербаджаньскы і голандьскы, теперь штудує словацькый язык. Выростав у Ню Йорку і в місті Лавренс в штаті Кансас.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА