Америцькый єпіскоп із віруючіма спознавали русиньскы Торискы і Нижні Репашы

На Словакії в тых днях є ґрупа путників із Споєных штатів Америкы. Віруючіх веде Ларрі Джеймс Кулик – єпіскоп Римокатолицькой дієцезы Ґрінсбурґ в Пенсілванії. Про многых членів той ґрупы як і про самого єпіскопа тото путованя має глубокый особный розмір, бо самы суть потомками америцькых Словаків.

Як інформовав отець Йосиф Мачейовскый, адміністратор Ґрекокатолицькой парохії Торискы, їх путованя веде через цілу Словакію, од западу аж по выход. В суботу 29-го авґуста 2026-го року завітали до Торисок, де навщівили Храм Покровы Пресвятой Богородіці.

„Тото село є обыстьом русиньской народностной меншыны, вдяка чому мали путници унікатну принагоду спознати почас свойой навщівы містну Ґрекокатолицьку церьков і културу Русинів,“ інформовав Мачейовскый.

Цінных гостів перед храмом сердечно привітав адміністратор парохії отець Йозеф Мачейовскый вєдно із містныма віруючіма із Торисок і Нижніх Репашів, што є філія парохії, котры їх привітали в традічных народных кроях.

„Путници не скрывали свій обдив ку духовній дідовизні нашых предків, як і ку шпеціфічній културі, звыкам і сердечній погостинности, што у своїх приговорах за цілу ґрупу веце раз высловив і сам єпіскоп.“

Єпіскоп вєдно із містным священиком в Торисках одправляли і Службу Божу, кедьже в тот день быв праздник Усікновенія.

По сполочній молитві адміністратор парохії представив село, історію, храм і вызначых родаків, котры мали пряме або непряме повязаня із жывотом Церькви в США. Путници дізнали ся, же із Торисок быв владыка Йоан Брадач (рр. 1732 – 1772), почас котрого єпіскопской службы была в році 1771 еріґована окрема Мукачовска ґрекокатолицька єпархія, яка стала Матірьов Церьквов про єпархії, котры выникли пізніше, включно тых, котры днесь творять русиньску Піттсбузьску митрополію.

Далшов вызначнов особностьов быв родак із Нижніх Репашів, ґрекокатолицькый священик Йосиф Гануля (рр. 1873 – 1962), котрый одышов до США, де служыв на парохіях в Пенсілванії.

„Быв істинным піоніром Ґрекокатолцькой церькви в Америці, безпрестанно боронив їй права, пошырьовав русиньску културу і ґрекокатолицьку духовность і културу, а з великов надійов смотрив до будучности за океаном, чім выразно овпливнив історію і жывот тамтешніх ґрекокатоликів,“ інформовав Мачейовскый.

Містны віруючі америцькым путникам вказали і традічный свадбляный звык – чепіня. Як подарунок дістав єпіскоп Кулик і писанку од містной віруючой, кедьже є їх зберательом, а в єпіскопскій резіденції має наіншталовану і выставу писанок.