Аплікация «Кухарка» доступна для хоснувателів систему Віндовс

Днешній світ помалы одходит од традицийных форм і радше зосереджат ся на вшыткым, што мобільне, функцийональне, або мінімалістичне, што подиктуване скорым розвитком інтернету і технолоґій. І Русины зрозуміли, же мусят іти тым путьом і в вельох просторах, жебы дотерти до як найвекшого чысла люди, зачынают хоснувати тоты можливости, котры нам приносит віртуальний світ. Єдном з такых форм є нова аплікация, котра остала приготовлена через Русинів з Войводины. То аплікация, котрій в офіциялным склепі Microsoft остал даний наголовок в русиньскым языку пн. Кухарка.

Як можеме прочытати в описі аплікациі – то перша проба схоснуваня сучасной технолоґіі для переданя рецептур на русиньскы стравы, популярны посеред Русинів Паноніі, до мобількы, або компутера. Авторы проґраму Кухарка критичні підходят до свого проєкту і в войводиньскым стандрарді русиньского языка застерігают: “Знам же може буц вельо лєпше алє думам же зоз дачим треба почац”. Попри тым, звертают ся з просьбом до вшыткых, што схоснуют іх аплікацию, жебы своі заувагы писали на webmaster@rusnaci.org. Поможут они в приготовліню будучых версий аплікациі.

Джерелом рецептур сут друкуваны позициі: «Рускій календар» і «Сучасна руска кухарка», а фотоґрафіі, образуючы вид даной стравы, прислали ріжны хоснувателі. В аплікациі находят ся рецептуры на поливкы (ріжного рода юхы: з капусты, квашена), головны стравы (капуста зо шкварками, капустяникы, перогы) і лакоткы. Хоц єст іх іщы невельо, то сама ідея – популяризувати русиньску кухню тым каналом, напевно заслугує на увагу. Попри тым, в аплікациі находят ся мотузкы, одсылаючы до сервісу YouTube, котры ведут нас до записів відео, вказуючых напр. як зробити паску, або домашню різанку.

Аплікация Кухарка має тіж своі ограничыня, понеже дедикувана єст лем на мобількы, таблеты і компутеры з операцийным системом Windows (в версиях 8 і 10). Мож єй побрати дармо з офіцияльного склепу Microsoft.