Апостол – Неділя блудного сына – неділя, 09.15 год.

Чітаня з Першого писма святого апостола Павла Корінтянам – зачало 135. (глава 6.; 12-20)

(Братя), вшытко мі є доволене, но не вшытко мі є на хосен. Вшытко мі є доволене, но я не буду служити ничому. Їдло є про жолудок, а жолудок про їдло; но Бог знищіть єдно і друге. Бо тіло не є про нечістоту, но про Господа, а Господь про тіло. Бог воскресив Господа, а воскресить і нас свойов силов.

Ці не знате, же вашы тіла суть уды Хрістовы? Ці тоды мам взяти уды Хрістовы і зробити їх удами чуджоложніці? То нияк раз! Або ці не знате, же тот, котрий спить із чуджоложніцьов, є з ньов єдным тілом? Бо є речене: Будуть двоє єдно тіло! Но хто увірить в Господа, є з ним єден Дух. Храньте ся нечістоты! Каждый іншый гріх, котрый чоловік зробить, є окреме од тіла, но хто чуджоложыть, грішить протів свойого тіла.

Ці не знате, же вашы тіла суть храмом Святого Духа, котрый є у вас, котрого мате од Бога, а же вы уж не свої? Бо вы куплены за велику ціну. Славте тоды Бога (і носьте його) у своїм тілі.