Голосник

Архівна реляция з засіданя членів ґорлицкой Бурсы

Каждый рік одбыват ся загальне зобраня членів Стоваришыня Руска Бурса в Ґорлицях. То долга традиция. Нич нове. Лем фурт продолжаня.

Про общы зобраня членів Общества Руска Бурса в Ґорлицях інформувала довоєнна лемківска преса. Коли зазераме до поєдных чысел ґазеты «Лемко», што кус можеме трафити на інформациі з діяльности ґорлицкой бурсы, котра все была не лем інтернатом про лемківску молодіж, але і інституцийом культуры, яка робила на розвиток Русинів по пілнічній стороні Карпат.

Чысло 44, котре было надрукуване в Креници, в четвер 21. (8.) листопада/новембра 1935 р., приносит реляцию «Присутного» з єдного з такых засідань. Засвідчат він, што Руска Бурса в Ґорлицях постійно ся розвивала. Збільшало ся чысло учеників, якы жыли при бурсі вчас побераня наукы в околичных школах.

Цікаве, што реляция з порядку зобраня спред років одповідат такой порядкови днешніх засідань. Так само контрольна комісия здавала рапорт і внескувала о абсолюторию для выконавчого выділу (заряду). Пак выберано предсідателя і членів заряду на дальшу каденцию.

Так по правді, не повинно нас оне чудувати. Днешня Руска Бурса то лем продолжыня довоєнной діяльности, сперта єст і о такій сам статут і нацийонально-культуровы ціли.

Ярослав Сьокало – доктор прав, адвокат. Народженый в Креници 21. лютого/фебруара 1885 р., вмер 12. грудня/децембра 1962 р. в Ґорлицях. Єден з довоєнных предсідателів ґорлицкой Руской Бурсы


 

Руска Бурса в Горлицах.

В неділю, дня 27.Х. отбыло ся обще собранє членов О-ва „Руска Бурса в Горлицах” под предсідательством д-ра Я. Сьокалы.

С отчета о діятельности оказало ся, што бурса розвиват ся штораз то лучше. Свідчит о том передовсем число воспытанников, котре с тамтогорочного 21 зросло в том році на 35. С тым 15 ходит до гимназии, 18 до школы народной, а 2 учит ся прыватно. Минувшого року ученникы рекрутовали ся лем с повіта горлицкого, а тепер лєского – 2, кроснянского – 3, ясельского – 1 и сандецкого – 3, а решта с горлицкого.

Приход бурсы за 1931/35 р. шк. выносит б.259‘59 зл. На суму тоту зложили ся: оплата ученников 46,0 зл., самообложенє місячне интелигенции 520 зл., аренда поля 263 зл., членскы взносы 189 зл., решта сплата долгов бурсі и пожертвованя. Росход выносил суму 6.157‘64 зл. На предложенє г. Т. Войтовича, предсідателя контрольной комисии, ствердившого, што ціле діловодство, книгы и квиты найдены в полном порядку, уділено абсолюторию и признательность уступаючому выділови.

До нового выділа выбрано : предсідателем д-ра Ярослава Сьокало с Горлиц, заст. предсід. и касиєром г. Николая Юрковского с Сквиртного, секретарем г. Теодосия Ядловского со Смерковца и членами выділа: г. Теодора Войтовича с Устя Руского, г. Романа Максимовича с Горлиц, г. Льва Желема с Мацины и Константына Бодака с Розділя; заступн. членов выділа : Дмитрия Златиканича с Смерковца и Михала Желема с Мацины Вел.

До контролной комисии вошли: Василь Малецкый, Дамян Будняк и Емилян Федорчак.

Присутный.
Шеруй.

О авторі

Севериян Косовскiй

Народженый на чужыні. Матуриста з лемківского языка. Завершыл юридичный факультет Вроцлавского Університету. Окрем того што гев, час-до-часу дописує до часопису Бесіда. Головный редактор Лемківского Річника. Любитель давной Лемковины. Годен годинами слуxати про втрачене лемківскє щестя. Контакт: seweryjan@lem.fm

Коментарі