Артистична інсталяция про выгнаня Лемків в Лутон (Анґлия)

Артистка з Лутон вказує выставу, котра експльорує історию єй предків, якых выгнано з Лемковины. Каролинa Лебек досліджат свою лемківску спадковину через традицийны пісні і спів як єден з факторів, котрий фурт єднат розпрошений нарід.

Од 21. лютого/фебруара до 24. марця 2018 р. в ґалериі мистецтв Storefront в Лутон мож видіти выставу «Ватра» Каролины Лебек, бывшой студенткы University of Bedfordshire. Выстава піднимат тему міґрациі, выселяня і ізоляциі, тых явиск, котрых досвідчыла єй лемківска родина.

Необхідніст культуровой коеґзистенциі при єдночасным захованю свойого языка і традициі єст основна, особливі в так культурово зріжницюваным місті як Лутон – повіла артистка. Выстава бесідує про свідоміст і шырше пізріня на соспільніст, єст протиставліньом ся аґресиі і соспільній несправедливости.

Інсталяция Каролины обнимат звук, відео і фотоґрафію. Інспірацийом явит ся ватра – огниско, яка прикликує спомины минулого, памят о людях, котры одышли, яка ожывлят почутя спільноты. Артистка вкаже ся на фінісажы выставы 24. марця з авдийовізуальным выступом, а товаришыла єй буде шотландска артистка Сусан Старк.

Актуальні Каролина Лебек продолжат едукацию в Royal College of Art. В своій творчости зосереджат ся на досліджаню феномену сакрум, з особливым заінтерсуваньом темом звязаном зо структуром реальности, бытьом, істнуваньом, сутьовістю ци анімізмом. Зглублят тему безчестя, сексуальности, ритуалів, міфів, прібує деєрархізувати «річы» і учутя. Через іманя ефекту памяти выражат вражливы і заєдно непокоючы світы і будує авторскій лексикон символичного языка, котрий выполнений єст недоповіджынями, сіганьом по табу.

Фот. asyouchange.co.uk, rca.ac.uk