Авдийопутівник по сандецкым скансені

Туристы уж не мусят нанимати провідника до опроваджаня іх по Сандецкым Етноґрафічным Парку. Тепер будут мати змогу звидіти парк самому, а о поміщеных в ним обєктах буде ім оповідала аплікация в мобільных телефонах, котра є інтерактивним водительом по сандецкым скансені.

Округовий Музей в Новым Санчы, котрого частю є скансен, урухомил звуковий путівник, цілю полегшыня туристам звиджаня Сандецкого Етноґрафічного Парку. То безплатна, проста в обслугуваню, і хосенна аплікация, котра доступна єст на операцийний систем Андроід (версия 4.0 або новша). Найліпше провірити єй на смартфонах або таблетах, хоснуючы слухавкы.

По старті аплікациі, треба войти в закладку «Авдийопутівник». Гын вкажут ся табличкы з 78 номерами, котры то номеры одповідают будинкам, поміщеным в скансені. Під каждым номером крыє ся знимка і опис обєкту, чытаний через Яцка Кужея з одділіня Промоциі Музею. Возме сой, же стоіме перед будинком номер 36 – втискаме одповідній номер і товды влучат ся лектор. Почуєме коротку інформацию о істориі, конструкциі ци інчых атрибутах даного будинку. Аплікация приближат туристам описы хыж, святынь та ґаздівскых обєктів, котры находят ся в сандецкым скансені од 40 років.

Сандецкій Етноґрафічний Парк то найвекший того рода скансен (музей під синім небом) в Малопольщы. Презентує деревяну архітектуру і традицийну, народну культуру ентоґрафічных і етнічных ґруп, заселяючых териториі історичных земель Сандеччыны. Серед них находят ся і Русины-Лемкы, прото в скансені выділена была і лемківска част. Поміщены там обєкты сут ориґінальны – розобраны в селах, де были збудуваны, пак перенесены і наново змонтуваны в Сандецкым Етноґрафічым Парку.

Аплікацию мож стягнути за тым мотузком.